Hakan Fidan İƏT Təşkilatının fövqəladə iclasına sədrlik edəcək

Türkiyə xarici işlər naziri Hakan Fidan 25 avqustda Ciddədə keçiriləcək İslam Əməkdaşlıq Təşkilatının (İƏT) 21-ci Fövqəladə Nazirlər Toplantısına Türkiyənin İƏT Xarici İşlər Nazirləri Şurasına (XİNŞ) sədrliyi çərçivəsində rəhbərlik edəcək.

TodayPress TV xəbər verir ki, bu barədə "TRT Haber" məlumat yayıb.  

Toplantı çərçivəsində Hakan Fidanın iki dövlətli həll əsasında Fələstin dövlətinin qurulmasının ədalətli və davamlı sülh üçün yeganə yol olduğunu qeyd etməsi gözlənilir. O, Türkiyənin Qəzzanın yenidən qurulması istiqamətində İƏT-AƏL (Ərəb Dövlətləri Liqası) planına dəstəyinin davam etdiyini də ifadə edəcək.

Nazirin, İƏT və İƏT-AƏL Qəzza üzrə Əlaqələndirmə Qrupunun fəaliyyətlərinin beynəlxalq ictimaiyyətin dəstəyinin təmin olunması baxımından əhəmiyyətini vurğulaması, Fələstin dövlətini tanıyacağını bəyan edən ölkələrin sayının artmasının ümidverici bir inkişaf olduğunu qeyd etməsi də gözlənilir.

Qeyd edək ki, Türkiyə 21-22 iyun tarixlərində İstanbulda keçirilən İƏT-in 51-ci Xarici İşlər Nazirləri Şurasının toplantısına ev sahibliyi etmiş və bir il müddətinə sədrliyi öz üzərinə götürmüşdü. Sözügedən toplantıda Fələstinlə bağlı iki qərar layihəsi qəbul olunmuş və İƏT ölkələri arasında Fələstin məsələsində ortaq mövqenin önəmi vurğulanmışdı. Həmçinin toplantı çərçivəsində “İstanbul Bəyannaməsi” də qəbul edilmişdi.

Töhfə Səməd