Britaniya və Fransa Hörmüz boğazı ilə bağlı yeni variantları müzakirə edir

Böyük Britaniya və Fransa Londonda keçirilən görüşdə hərbi planlaşdırıcılara Hörmüz boğazında naviqasiya azadlığını təmin etmək üçün “praktik hərbi variantları” nəzərdən keçirməyi tapşırıblar.

TodayPress TV xəbər verir ki, bu barədə "CNN" məlumat yayıb.

Britaniyanın müdafiə naziri Con Hili və Fransanın müdafiə naziri Ketrin Votrin birgə mesajlarında bildiriblər ki, məqsəd liderlərin əldə etdiyi diplomatik razılaşmaları konkret hərbi planlara çevirməkdir. Onların sözlərinə görə, bu planlar boğazda naviqasiya azadlığını qorumağa yönəlmiş koordinasiyalı fəaliyyətləri əhatə etməlidir.

Böyük Britaniya Müdafiə Nazirliyi tərəfindən yayılan bəyanatda qeyd olunub ki, diplomatik təşəbbüslərin həyata keçirilməsi üçün dəqiq planlaşdırma, açıq müzakirələr və müttəfiqlərin güclü öhdəliyi vacibdir. Artıq bir sıra ölkələrin bu prosesə töhfə verməyə hazır olduqları bildirilir.

Nazirlər vurğulayıblar ki, bu addımlar boğazın yenidən açılmasına, qlobal iqtisadiyyatın sabitləşməsinə və təhlükəsizliyin gücləndirilməsinə kömək edə bilər.

Onlarla ölkədən hərbi strateqlər Londonda, Britaniyanın Daimi Birgə Qərargahında keçirilən iki günlük konfransda iştirak edir. Tədbirin ikinci günündə su yolunun təhlükəsizliyinin bərpası üçün konkret addımlar müzakirə olunacaq.

Türkan İsgəndərli

TodayPress TV