ABŞ-nin bir neçə ştatı Vaşinqtona Milli Qvardiya qüvvələri göndərir

ABŞ-nin Qərbi Virciniya, Ohayo və Cənubi Karolina ştatları ictimai asayişin təmin olunması məqsədilə paytaxt Vaşinqtona ümumilikdə təxminən 700 nəfər Milli Qvardiya hərbçisi göndərəcək.

TodayPress TV xəbər verir ki, bu barədə "The New York Times" məlumat yayıb.

Bildirilib ki, Qərbi Virciniya qubernatoru Patrik Morrisey 300-400 hərbçinin, Ohayo qubernatoru Mayk Devayn 150 nəfərin, Cənubi Karolina qubernatoru Henri Makmaster isə 200 Milli Qvardiyaçının paytaxta göndəriləcəyini açıqlayıb.

Xatırladaq ki, avqustun 11-də ABŞ Prezidenti Donald Tramp cinayətkarlığa qarşı mübarizə məqsədilə Milli Qvardiya qüvvələrinin Vaşinqtona yerləşdiriləcəyini bəyan edib. O, həmçinin şəhər polisinin birbaşa federal idarəetməyə tabe ediləcəyini bildirib və lazım gələrsə, təhlükəsizliyin təmin olunması üçün Silahlı Qüvvələrin də prosesə cəlb oluna biləcəyini istisna etməyib.

Töhfə Səməd