6000-dən çox İtaliya şirkəti risk altındadır

Avqustun 1-dən etibarən Avropa İttifaqı və Meksikadan idxal olunan məhsullara 30 faiz gömrük rüsumu tətbiq ediləcək. ABŞ Prezidenti Donald Trampın bu qərarı minlərlə İtaliya şirkətini birbaşa təhdid edir.

TodayPress TV xəbər verir ki, İtaliya Ticarət Agentliyinin (ITA) çərşənbə günü yaydığı hesabatda 6000-dən çox İtaliya şirkətinin yeni tarif risklərinə birbaşa məruz qaldığı bildirilib.

Əsasən içki sənayesi, metal məmulatları, əczaçılıq, mebel, pərakəndə ticarət və avtomobil istisna olmaqla nəqliyyatla bağlı məhsullar kimi yüksək əlavə dəyər yaradan sahələrdə fəaliyyət göstərən mikro və kiçik müəssisələr bu qərardan təsirlənəcək.

Hesabatda bu şirkətlərin ABŞ-yə ixrac etdiyi məhsulların dəyərinin 11 milyard avronu (təxminən 12,76 milyard ABŞ dolları) keçdiyi vurğulanır.

Cənubi İtaliyanın sənaye inkişafına dəstək verən SVIMEZ təşkilatı isə xəbərdarlıq edib ki, bu tariflər 2026-cı ildə İtaliya iqtisadiyyatının 0,5 faiz azalmasına və 150 minə qədər iş yerinin itirilməsinə səbəb ola bilər.

Qiymət Mahir