Kəlağayı əlvan, qıyqacı... - Qadınlarımızın xanımlıq ölçüsünə ictimai münasibət

Baş örtüklərindən istifadə ilə bağlı yayılan məlumatlar cəmiyyətdə geniş reaksiya doğurub və bir çox tanınmış simalar tərəfindən rəğbətlə qarşılanıb.  

Bu məsələyə münasibət bildirən ziyalı həkim və tanınmış sosial media istifadəçisi Müşfiq Hüseynov kəlağayının milli dəyər kimi əhəmiyyətini TodayPress TV-yə belə izah edib: 

“Kəlağayı bizim buta, xalça, İçərişəhər və Qız qalası kimi ən qiymətli, milli dəyərlərimizdən biridir. Məsələn, kişilərin başına qoyduğu papaq necə milli rəmz sayılırsa, kəlağayı da eyni dərəcədə əhəmiyyətlidir. Belə ki, o, hətta UNESCO-nun mədəni irs siyahısına bəşəriyyətin mədəni sərvəti kimi daxil edilib”. 

Ziyalı bildirib ki, kəlağayı əlvandır. Qara və ya boz deyil, rəngarəngdir. Regionlardan asılı olaraq onun rəngləri və naxışları dəyişir; mavi, qızılı, qırmızı, sarı, yaşıl... Bu rənglər daha çox Novruzun, baharın, fəsillərin dəyişən rəngləri ilə uyuşur və tarix boyu qadınlarımızın geyimləri ilə xüsusi ahəng təşkil edib. Azərbaycan qadını tarixən qara geyinməyib, həmişə al-əlvan rənglərə üstünlük verib və xoşbəxt görünüb. Onun sözlərinə görə, qara və tutqun rənglər Azərbaycana sonradan gəlib. 

“Digər tərəfdən, əgər məqsəd saçı örtməkdirsə, istər gigiyenik, istərsə də başqa səbəbdən kəlağayı da bu funksiyanı yerinə yetirə bilir. Mütləq bizə aid olmayan  vasitələrdən istifadə etmək şərt deyil”, - deyə M. Hüseynov fikrini yekunlaşdırıb. 

Aysel Mətləb

TodayPress TV