Əhməd İsmayılov: “Media və dövlət arasında sağlam dialoq qurulur”

“Artıq üç ildir ki, ölkəmizin media gündəminin aktual əhəmiyyət kəsb edən ictimai məzmunlu məsələlərinin müzakirəsini hədəfləyən Forum dövlət-media dialoqunu formalaşdıran səmərəli platforma kimi özünü təsdiqləmişdir”.

TodayPress TV xəbər verir ki, bunu Azərbaycan Respublikasının Medianın İnkişafı Agentliyinin təşkilatçılığı ilə təşkil olunan “İctimai proseslər media müstəvisində” mövzusunda 3-cü Forumda Agentliyinin İcraçı direktoru Əhməd İsmayılov deyib.

O bildirib ki, cəmiyyətin sosial sifarişi kimi meydana çıxan “İctimai proseslər media müstəvisində” platformasını yaratmaqda Medianın İnkişafı Agentliyinin məqsədi informasiyanın peşəkar formada hazırlanıb ötürülməsinə məsuliyyət daşıyan media subyektləri ilə informasiyanın mötəbər mənbəyi funksiyasını yerinə yetirən dövlət orqanları arasında sağlam münasibətlərin qurulmasına dəstək olmaq, ictimai məzmunlu jurnalistika kontentinin hazırlanmasında peşəkarlıq səviyyəsini daha da artırmaqdır:

“Bildiyiniz kimi, 2026-ci il Azərbaycan Respublikasının Prezidenti cənab İlham Əliyevin müvafiq Sərəncamı ilə ölkəmizdə “Şəhərsalma və Memarlıq İli” elan edilmişdir. Bu il 17-22 may tarixlərində isə Bakıda qlobal əhəmiyyətli möhtəşəm tədbir – Ümumdünya Şəhərsalma Forumunun On Üçüncü Sessiyası (WUF13) keçiriləcəkdir. Artıq Medianın İnkişafı Agentliyi və WUF13 Azərbaycan Əməliyyat Şirkətinin birgə təşkilatçılığı ilə “WUF13: Dayanıqlı şəhərsalmanın inkişafı və medianın rolu” mövzusunda silsilə məlumatlandırma sessiyaları təşkil olunmuşdur. Mövzunun spesifik cəhətini və müstəsna ictimai əhəmiyyətini nəzərə alan jurnalistlərimizin məlumatlandırma sessiyalarında fəal iştirakı cəmiyyətin informasiya ilə təminatında öz ciddi təsirini göstərəcəkdir”.

Ə.İsmayılov əlavə edib ki, Azərbaycanda şəhərsalma mədəniyyəti böyük tarixi irsə istinad edir:

“Əminik ki, mötəbər tədbir çərçivəsində ölkəmizə səfər edəcək xarici qonaqlarımızda Bakının və digər şəhərlərimizin timsalında milli memarlığımız və şəhərsalma ənənələrimiz barədə dolğun təəssürat yaranacaqdır. Vurğulamaq istərdik ki, müasir Azərbaycan dövlətçiliyinin ideoloji sütunlarını ucaldan, milli dirçəlişin sarsılmaz təməllərini qoyan Ümummilli Lider Heydər Əliyev müasir Azərbaycan dövlətinin memarı olmaqla yanaşı, ölkəmizin şəhərlərinin estetik və funksional baxımdan yeni simasının yaradıcısı, milli memarlıq məktəbinin hamisi kimi tarixə düşmüşdür.

Müstəqillik illərində Ulu Öndərin müəllifi olduğu quruculuq xətti dövlətimizin qüdrətini və xalqımızın estetik zövqünü bütün dünyaya nümayiş etdirmişdir.

Ulu Öndərin şəhərsalma vizyonunun bu gün beynəlxalq səviyyədə təsdiqini tapmasının ən mühüm nümunələrindən biri də Ümumdünya Şəhərsalma Forumunun (WUF) 13-cü sessiyasının Bakıda keçirilməsi ilə bağlı qəbul edilmiş qərardır. WUF13-ün Bakıda təşkili Azərbaycanın şəhərsalma sahəsində əldə etdiyi uğurların beynəlxalq ictimaiyyət tərəfindən yüksək qiymətləndirilməsinin göstəricisidir”.

Qiymət Mahir

TodayPress TV