MARAQLI KƏŞF: Həyat Yer üzündə iki dəfə yaranıb?

Alimlər Yer üzündə həyatın yaranması ilə bağlı yeni və təəccüblü nəzəriyyə irəli sürüblər. Araşdırmaya görə, həyatın yalnız bir dəfə deyil, iki ayrı mərhələdə müstəqil şəkildə yaranmış olması mümkündür.

TodayPress TV xəbər verir ki, tədqiqatçılar mikroorqanizmlərin təkamülünün ən erkən mərhələlərini araşdıraraq bakteriya və arxeyaların əsas metabolik reaksiyaları kataliz etmək üçün fərqli mexanizmlər inkişaf etdirdiyini müəyyənləşdiriblər.

Araşdırmada 420 kimyəvi reaksiya, genomlar və zülal strukturları təhlil edilib. Alimlərin fikrincə, hidrotermal mənbələrdəki metallar həyatın ilkin formalarının yaranmasında mühüm rol oynayıb.

Tədqiqatın müəlliflərindən bioloq Uilyam Martin bildirir ki, söhbət genetik kodun bir mənşəyindən, lakin həyatın iki mənşəyindən gedə bilər.

Alimlər həyatın ilkin inkişafını üç mərhələyə bölüblər: əvvəlcə yalnız metallara əsaslanan sistem, daha sonra metallar və fermentlərin birlikdə iştirak etdiyi mərhələ və nəhayət bakteriya ilə arxeyaların əcdadlarının ayrılması.

Kübra Musayeva