Günəş tutulması görmə qabiliyyətinə zərər verə bilər
12 avqustda baş verən günəş tutulması ilə əlaqədar mütəxəssislər insanları gözlərini qorumağa çağırırlar.
TodayPress TV xəbər verir ki, əvvəllər günəş tutulmasını lazımi qoruyucu vasitələr olmadan izləyən bir şəxsin hər iki gözünün tor qişasının zədələnməsi hadisəsi bu təhlükənin ciddi olduğunu göstərir.
Belə zədələnmədən sonra görmə qabiliyyətində uzunmüddətli problemlər yarana bilər. Zərər görən şəxslərdə gözlər qarşısında işıq parıltıları, ləkələr və digər görmə pozuntuları müşahidə oluna bilər. Torlu qişanın, xüsusilə də mərkəzi görməyə cavabdeh olan makulanın zədələnməsi geri dönməz ola bilər.
Oftalmoloqlar bildirirlər ki, hətta qismən günəş tutulması zamanı belə Günəşin işığı gözlər üçün təhlükəli olaraq qalır. Günəşə lazımi qorunma olmadan baxmaq gözün arxa hissəsində “günəş yanığı”na bənzər zədələnməyə və mərkəzi görmənin uzunmüddətli pozulmasına səbəb ola bilər.
Mütəxəssislər tutulmanı izləmək istəyənlərə "ISO 12312-2" təhlükəsizlik standartına cavab verən sertifikatlı tutulma eynəklərindən istifadə etməyi və ya Günəşi dolayı üsulla müşahidə etməyi tövsiyə edirlər.
Adi günəş eynəklərindən istifadə etmək, həmçinin qoruyucu filtr olmadan kamera, durbin və teleskop vasitəsilə Günəşə baxmaq təhlükəlidir və gözlərdə ciddi, hətta geri dönməz zədələnmələrə səbəb ola bilər.
Türkan İsgəndərli
