Çimərliklərdə gizlilik üçün atlardan istifadə edilirdi? Tarixin maraqlı səhifəsi
Bu gün çimərliyə gedib rahatlıqla dənizə giririk. Ancaq XVIII-XIX əsrlərdə İngiltərədə, xüsusilə qadınlar üçün dənizə girmək heç də bu qədər asan deyildi.
TodayPress TV xəbər verir ki, o dövrdə çimərliklərdə “Bathing Machine” — çimmək arabası adlanan təkərli taxta kabinlərdən istifadə olunurdu.
Qadınlar bu kabinlərin içərisində paltarlarını dəyişir, daha sonra isə kabin atların köməyi ilə dənizə qədər aparılırdı. Beləliklə, onlar kənar şəxslərin baxışlarından uzaq şəkildə suya girə bilirdilər.
Bəzi kabinlərdə məxfiliyi qorumaq üçün dənizə açılan qapının ətrafına xüsusi pərdələr də quraşdırılırdı.
Bəs insanlar niyə dənizdə çimməyə bu qədər əhəmiyyət verirdilər?
Həmin dövrdə dənizdə çimmək təkcə əyləncə hesab olunmurdu. Həkimlər dəniz suyunun sağlamlığa faydalı olduğuna inanır, hətta onu müalicə məqsədilə tövsiyə edirdilər.
Daha bir maraqlı məqam isə o dövrdə mövcud olan xüsusi peşə idi. “Dipper” adlanan qadın köməkçilər üzməyi bacarmayan insanlara suya girməkdə kömək edir, onları dalğaların arasında müşayiət edirdilər.
Bu peşənin ən tanınmış nümayəndələrindən biri İngiltərənin Brayton şəhərində çalışan Marta Qann idi. O, o qədər məşhurlaşmışdı ki, dövrünün tanınmış şəxsləri arasında da adı bilinirdi.
Maraqlıdır ki, çimmək arabalarından kişilər də istifadə edirdilər. Lakin qadınların geyimi və şəxsi məxfiliyi ilə bağlı ictimai qaydalar daha sərt idi.
Zaman keçdikcə çimərlik geyimləri dəyişdi, qadınlarla kişilərin eyni çimərliklərdə çimməsi geniş yayıldı və bu qeyri-adi arabalar öz əhəmiyyətini itirdi. Bununla belə, bəzi çimərliklərdə onlardan XX əsrdə də istifadə olunurdu.
Türkan İsgəndərli
