“Vaşinqton”dan jest: fanatlar üçün xüsusi gün

“Vaşinqton Keptalz” son ev oyununda azarkeşlərə Aleksandr Oveçkinin təsviri olan xüsusi dəsmallar paylayacaq.

TodayPress TV xəbər verir ki, bu aksiya ABŞ Milli Xokkey Liqasının (NHL) müntəzəm mövsümünün son ev matçında həyata keçiriləcək. Paytaxt təmsilçisi həmin oyunda “Pittsburq Pinqvinz” ilə qarşılaşacaq.

Məlumata görə, dəsmalların üzərində Oveçkinin karyerasının müxtəlif mərhələlərini əks etdirən görüntülər və “Gr8ness” yazısı yer alacaq.

Qeyd edək ki, 40 yaşlı hücumçunun klubla müqaviləsi 2026-cı ilin yayında başa çatır. O, NHL-in müntəzəm çempionatlarında indiyədək 928 qol vurub. Pley-off mərhələsi də daxil olmaqla, ümumi qol sayı 1005-dir və bu göstərici ilə yalnız Ueyn Qretskidən geri qalır.

Daha əvvəl Oveçkin yayda karyerasını davam etdirib-etdirməyəcəyi ilə bağlı qərar verəcəyini açıqlayıb.

Namiq HUN

TodayPress TV