Temu 200 milyon avro CƏRİMƏLƏNDİ
Çin mənşəli onlayn alış-veriş platforması “Temu” Avropa İttifaqının (Aİ) rəqəmsal qaydalarını pozduğu üçün milyonlarla avro cərimələnib.
TodayPress TV xəbər verir ki, Avropa İttifaqı Komissiyası “Temu” platformasına “Rəqəmsal Xidmətlər Aktı”nı (DSA) pozduğu əsas gətirilərək 200 milyon avro məbləğində cərimə tətbiq edib.
Komissiyanın açıqlamasında bildirilib ki, “Temu” platformasında qanunsuz məhsulların satışı ilə bağlı sistemli riskləri kifayət qədər müəyyən etməyib və qiymətləndirməyib. Qeyd olunub ki, Aİ ölkələrində istehlakçıların platformada qanunsuz məhsullarla qarşılaşma ehtimalı yüksəkdir və şirkətin 2024-cü il üzrə risk qiymətləndirməsi DSA standartlarına uyğun olmayıb.
Araşdırma çərçivəsində həyata keçirilən gizli alış-veriş testləri zamanı seçilən enerji doldurucularının böyük hissəsinin əsas təhlükəsizlik yoxlamalarından keçmədiyi müəyyən edilib. Həmçinin bəzi uşaq oyuncaqlarında kimyəvi maddələrin normanı aşdığı, yaxud qopa bilən hissələr səbəbindən boğulma riski yaratdığı vurğulanıb.
Açıqlamada “Temu”nun tövsiyə sistemləri və influenser dəstəkli məhsul tanıtım proqramlarının qanunsuz məhsulların yayılması riskini yetərincə qiymətləndirmədiyi qeyd olunub. Aİ qaydalarına əsasən, böyük onlayn platformaların xidmətləri ilə bağlı sistemli riskləri ciddi şəkildə analiz etməsi və uyğun tədbirlər görməsi tələb edilir.
Komissiya “Temu”nun 28 avqust 2026-cı ilə qədər pozuntuların aradan qaldırılması ilə bağlı fəaliyyət planı təqdim etməli olduğunu bildirib. Əks halda şirkətin əlavə dövri cərimələrlə üzləşə biləcəyi qeyd olunub.
Aysel Mətləb
