Rutte: NATO bir milyard insanın təhlükəsizliyi üçün hər şeyi edir
NATO-ya üzv ölkələrin müdafiə nazirlərinin Brüsseldə keçirilən toplantısı başa çatıb.
TodayPress TV Alyansın saytına istinadla xəbər verir ki, NATO-nun Haaqa Sammitindən sonra keçirilən ilk görüşdə çəkindirici siyasət, pilotsuz uçuş aparatlarına qarşı təşəbbüslər, müdafiə sərmayələri və Ukraynaya dəstək məsələləri müzakirə olunub.
Nazirlər NATO-nun çəkindirici və müdafiə potensialının gücləndirilməsi məsələsini, o cümlədən “Şərq Keşikçisi” (“Eastern Sentry”) proqramı çərçivəsində görüləcək tədbirləri müzakirə ediblər.
Baş katib Mark Rutte Alyansın hazırlıq vəziyyətindən danışıb: “NATO müdafiə xarakterli alyansdır. Bu müdafiə alyansı bir milyard insanın təhlükəsizliyi və ərazilərin qorunması üçün nə lazımdırsa edir”.
Müzakirələr zamanı müdafiə xərclərinin artırılması və yeni təhdidlərə uyğun innovativ yanaşmalar önə çəkilib. Son hadisələrdən çıxarılan nəticələr əsasında nazirlər NATO-nun pilotsuz uçuş aparatlarına qarşı imkanlarını genişləndirmək üçün əlavə tədbirlərin həyata keçirilməsi barədə razılığa gəliblər. Bu tədbirlər çərçivəsində “Şərq Keşikçisi” proqramı daxilində inteqrasiya olunmuş dron əleyhinə sistemlərin sınaqdan keçirilməsi, həmçinin Avropa İttifaqı və özəl sektorla sürətli innovasiya sahəsində əməkdaşlığın gücləndirilməsi nəzərdə tutulur.
İclasda üzv ölkələr Ukraynaya sarsılmaz dəstəklərini bir daha təsdiqləyiblər. Bu mövzu Ukraynanın müdafiə naziri Denis Şmıqal və Avropa İttifaqının xarici işlər və təhlükəsizlik siyasəti üzrə ali nümayəndəsi Kaya Kallasın iştirakı ilə keçirilən NATO–Ukrayna Şurasının iclasında və Ukrayna Müdafiə Əlaqə Qrupunun toplantısında müzakirə olunub.
Mark Rutte Rusiyanın qış mövsümündən əvvəl Ukraynanın mülki infrastrukturuna hücumlarını davam etdirdiyi bir vaxtda müttəfiqlərin yardımının əhəmiyyətini vurğulayaraq, bu dəstəyin fasiləsiz davam edəcəyini bildirib.
Jalə Rövşən
