Polis Avropada narkoşəbəkəni ifşa etdi: 275 milyon dollarlıq narkotik götürüldü

Polşa polisi Avropa miqyasında fəaliyyət göstərən bir neçə əlaqəli narkotik qaçaqmalçılığı şəbəkəsini zərərsizləşdirdiyini açıqlayıb.

TodayPress TV xəbər verir ki, Polşa Mərkəzi İstintaq Bürosunun (CBSP) məlumatına görə, əməliyyatlar zamanı ümumilikdə 1 milyard zlotı (təxminən 275 milyon dollar) dəyərində narkotik maddə götürülüb.

Hüquq-mühafizə orqanlarının bildirdiyinə görə, şəbəkənin əsas nüvəsini İspaniyada yaşayan polyaklar təşkil edib. Bəzi üzvlərin isə Polşa futbol azarkeşləri arasında əlaqələri olub. İstintaq zamanı 600 kq marixuana, 180 kq həşiş, 40 kq amfetamin sulfatı, 7 ədəd odlu silah və yüzlərlə patron müsadirə olunub.

Əsas qruplaşma İrlandiya, Almaniya, Avstriya və Skandinaviya ölkələrində narkotik ticarəti ilə məşğul olub. İstintaq Avropa İttifaqına üzv bir sıra dövlətlərin hüquq-mühafizə orqanları ilə birgə aparılıb.

Bundan əlavə, 50 milyon zlotıdan artıq dəyəri olan əmlak, eləcə də bahalı saatlar və avtomobillər də müsadirə edilib. Ümumilikdə 170-dən çox şəxsə ittiham irəli sürülüb, onlardan 110-dan artıq şəxs müxtəlif vaxtlarda saxlanılıb.

Artıq ilk hökmlər çıxarılıb və bəzi şəxslər 10 ildən çox müddətə azadlıqdan məhrum edilib. İstintaq davam edir.

Qiymət Mahir