“American Airlines” təyyarəsində güllə izləri aşkarlandı
Medellin–Mayami marşrutu ilə uçan "American Airlines" təyyarəsinin gövdəsində güllə deşikləri aşkar edilib.
TodayPress TV xəbər verir ki, bu barədə “ABC News” məlumat yayıb.
Bildirilib ki, ilkin araşdırma nəticələri təyyarənin fevralın 22-si Medellin şəhərinə eniş edərkən atəşə məruz qaldığını göstərir və hadisə zamanı xəsarət alan olmayıb.
“American Airlines” şirkəti bəyan edib ki, təyyarə Miami şəhərinə qayıtdıqdan sonra rutin texniki baxış zamanı gövdədə deşik aşkarlanıb. Şirkət təyyarənin dərhal istismardan çıxarıldığını, əlavə yoxlama və təmir üçün tədbir görüldüyünü bildirib.
“Hadisənin araşdırılması üçün bütün müvafiq qurumlarla sıx əməkdaşlıq edəcəyik”, – deyə aviaşirkətin açıqlamasında qeyd olunub.
Aysel Mətləb
