115 min insan "şəhərləşmə"yə qoşuldu
WUF13 yalnız forum məkanı ilə məhdudlaşmayıb, müxtəlif şəhərlərdə keçirilən tədbirlərlə 115 mindən çox insanı dayanıqlı şəhər inkişafı müzakirələrinə cəlb edib.
TodayPress TV xəbər verir ki, bunu Dövlət Şəhərsalma və Arxitektura Komitəsinin sədri Anar Quliyev WUF13-ün rəsmi bağlanış mətbuat konfransında çıxışı zamanı deyib.
O bildirib ki, WUF13 konfrans məkanından kənara da genişlənərək Bakı Şəhər Həftəsi, 55 tədbir və “Move Certain Festival” vasitəsilə doqquz şəhəri əhatə edib.
Komitə sədrinin sözlərinə görə, ümumilikdə 115 mindən çox insan dayanıqlı şəhər inkişafı ilə bağlı müzakirələrə qoşulub.
Anar Quliyev qeyd edib ki, forum qlobal miqyasda da geniş görünürlük qazanıb və 1000-dən çox akkreditə olunmuş media nümayəndəsinin dəstəyi ilə forumun mesajları dünya auditoriyasına çatdırılıb:
“Gənclərin iştirakı WUF13-ün əsas fərqləndirici cəhətlərindən biri oldu. Forumun təşkili və fasiləsiz fəaliyyəti üçün 12 min könüllü çalışdı. Bu, Azərbaycan gənclərinin peşəkarlığını, qonaqpərvərliyini və dinamizmini nümayiş etdirdi. Gənclərin iştirakı bilik mübadiləsi, bacarıqların inkişafı və qlobal şəhər proseslərində daha güclü iştirak baxımından WUF13-ün ən dəyərli irslərindən biri hesab oluna bilər”.
Komitə sədri əlavə edib ki, forum çərçivəsində bir sıra yeni təşəbbüslər də irəli sürülüb.
Onun sözlərinə görə, Heydər Əliyev Fondunun vitse-prezidenti və IDEA İctimai Birliyinin təsisçisi və rəhbəri Leyla Əliyevanın təşəbbüsü ilə WUF13 çərçivəsində “Yeni Şəhər Gündəliyinə həyat vermək: Dayanıqlı şəhərlər üçün hava keyfiyyəti və yaşıl infrastrukturun inteqrasiyası” adlı yüksək səviyyəli forum təşkil olunub.
Anar Quliyev bildirib ki, tədbirdə təmiz hava və yaşıl infrastrukturun dayanıqlı şəhər inkişafının və sağlam yaşayış mühitinin əsas komponentləri olduğu vurğulanıb.
O qeyd edib ki, görüşün yekununda qəbul edilən kommünikedə beynəlxalq ictimaiyyətə gələcək Ümumdünya Şəhərsalma Forumlarında təmiz havanın daimi tematik prioritet kimi tanınması çağırışı edilib.
Komitə sədri əlavə edib ki, “Təhlükəsiz Qayıdış üçün Ağıllı və Dayanıqlı Məskunlaşmalar Paketi” (4SRB) praktiki bərpa mexanizmi kimi təqdim olunub və bu təşəbbüs iqlimə davamlı, ekoloji baxımdan dayanıqlı, sülhü təşviq edən və insan mərkəzli şəhər bərpası üçün inteqrasiya olunmuş həllərin hazırlanmasına mühüm töhfə verir. Xüsusilə də həssas və postmünaqişə şəraitində bu yanaşmanın əhəmiyyəti vurğulanıb.
Anar Quliyev çıxışını belə yekunlaşdırıb: “Hörmətli media nümayəndələri, WUF13 yalnız konfrans deyil, bu, fəaliyyət platformasıdır”.
Qiymət Mahir
