Gənc voleybolçularımız üçün Avropa yolunda həlledici sınaq!
16 yaşadək voleybolçu oğlan və qızlardan ibarət Azərbaycan milli komandaları Avropa çempionatının birinci təsnifat mərhələsi çərçivəsində keçiriləcək Şərqi Avropa Voleybol Zonal Assosiasiyasının (EEVZA) çempionatında iştirak edəcəklər.
TodayPress TV xəbər verir ki, yarışlar noyabrın 19-dan 22-dək təşkil olunacaq.
Oğlanlardan ibarət U-16 millimiz Latviyanın paytaxtı Riqada mübarizə aparacaq. B qrupunda yer alan komandamız Latviya və Finlandiya yığmaları ilə qarşılaşacaq. A qrupunda isə Polşa, Estoniya və Ukrayna komandaları çıxış edəcəklər.
Qızlardan ibarət millimiz Estoniyanın Kaariku şəhərində qüvvəsini sınayacaq. B qrupunda yer alan yığmamızın rəqibləri Estoniya, Litva və Ukrayna komandaları olacaq. A qrupunda isə Polşa, Gürcüstan və Finlandiya kollektivləri mübarizə aparacaqlar.
Reqlamentə əsasən, qruplarda ilk üç yeri tutan komandalar yekun sıralama uğrunda mübarizə aparacaqlar. Qrup qalibləri finalda turnirin çempionunu müəyyənləşdirəcəklər.
Yarışın qalibi 2027-ci ildə keçiriləcək Avropa çempionatının final mərhələsinə vəsiqə qazanacaq.
Oğlanlardan ibarət U-16 millimizin oyunları:
19 noyabr
18:00. Latviya - Azərbaycan
20 noyabr
18:00. Azərbaycan - Finlandiya
Qızlardan ibarət U-16 millimizin oyunları:
19 noyabr
19:00. Estoniya - Azərbaycan
20 noyabr
16:00. Azərbaycan – Ukrayna
21 noyabr
19:00. Litva – Azərbaycan
Namiq HUN
