Cockerill İ-X: Dünyanın İlk “Stealth” Hərbi Quru Platforması

Belçikanın aparıcı müdafiə şirkəti olan "John Cockerill Defense" tərəfindən hazırlanmış "Cockerill İ-X" ənənəvi zirehli texnika anlayışını dəyişdirən innovativ platformadır. Yüksək sürət, gizlilik və süni intellektin birləşməsi sayəsində düşmən təhdidlərini hədəfə çatmadan əvvəl aşkar edib zərərsizləşdirmək üçün nəzərdə tutulub.

Platforma "stealth" (gizlilik) xüsusiyyətinə malikdir: azaldılmış radar, infraqırmızı və akustik izlər sayəsində daha çətin aşkarlanır.

Layihə ilk dəfə 2022-ci ildə "World Defense Show" sərgisində təqdim olunub. Ekipajı 2 nəfərdən ibarətdir, çəkisi təxminən 3,5 tondur və 750–800 at gücündə mühərriklə 200 km/saatadək sürət yığa bilir.

Karbon-kompozit korpus və hidropnevmatik asqı sistemi maşına həm yüksək möhkəmlik, həm də çətin ərazilərdə sabit hərəkət imkanı verir. Silahlanmasına 25/30 mm avtomatik top, pulemyot və tank əleyhinə raketlər daxildir. Avtomatik top lazım gəldikdə korpusun daxilinə çəkilə bilir, bu da maşının həm gizliliyini, həm də aerodinamikasını qoruyur.

Ən vacib üstünlükləri adaptiv kamuflyaj, 360° sensorlar və süni intellekt əsaslı idarəetmədir ki, bu da real vaxtda tam situasiya nəzarəti yaradır.

"Cockerill İ-X" ağır zirehli texnikaya alternativ olaraq daha yüngül, sürətli və asimmetrik müharibə üçün uyğun həll kimi qiymətləndirilir.

Nicat Osmanlı