X nəsli ABŞ ən uğursuz nəsil oldu: Hakimiyyət onlara qismət olmadı

Konqresdə Millennial nəslinin (Y nəslinin) üstünlük qazanması barədə çox danışılır. Lakin əslində yanvar ayından etibarən ABŞ Konqresində sayca ən böyük nəsil X nəsli olacaq. Klassik X nəsli üslubunda isə bunu, demək olar ki, heç kim fərq etməyib və ya buna əhəmiyyət verməyib.

TodayPress TV  “The Washington Sun” nəşrinə iatinadən xəbər verir ki, X nəslinin bu mərhələyə çatması xeyli vaxt aparıb. Mövcud olduğu bütün dövr ərzində bu nəsil, ən azı bir əsrdən çox əvvəl müasir Senatın formalaşmasından bəri, siyasi baxımdan ən az təsirə malik nəsil olub.

X nəslinin siyasi uğursuzluğu ən yüksək vəzifələrdən başlayır. O, indiyədək həm prezidentlik, həm də vitse-prezidentlik postlarından kənarda qalan yeganə uyğun yaş qrupudur. Bu nəslin həmin vəzifələrə ən yaxınlaşdığı məqam uğursuz vitse-prezidentliyə namizəd Pol Rayanın namizədliyi olub. Halbuki ondan daha gənc olan Millennial nəslinin nümayəndəsi Cey Di Vens artıq həmin vəzifəni tutub.

X nəslinin Konqresdəki fəaliyyəti də o qədər təsirli olmayıb. Bu nəslin ilk nümayəndələrinin 1995-ci ildə Konqresə daxil olmasından bəri X nəsli digər nəsillərin siyasi inkişaflarının eyni mərhələsində əldə etdikləri göstəricilərdən xeyli geridə qalıb. (2027-ci il üçün bütün seçki dairələrində nəticələr hələ dəqiqləşmədiyindən statistik göstəricilər noyabrın 9-na olan səs sayımında öndə gedən namizədlər əsasında hesablanıb.)

X nəslinin seçkilərdəki zəif nəticələrinin bir hissəsini onun sayca kiçik olması ilə izah etmək olar. Bu nəslin nümayəndələrinin sayı Baby Boomer, Millennial və Z nəsilləri ilə müqayisədə xeyli azdır. Millennial və Zoomer qohumları kimi, X nəslinin də formalaşma dövrü cəmi 16 il çəkib. Müqayisə üçün, Baby Boomer nəslinin bu dövrü 19 il, Greatest Generation adlanan nəslin isə 27 il olub.

Lakin nəsillərin yaş dövrlərini nəzərə alsaq belə, X nəslinin siyasi göstəriciləri yenə də olduqca zəif görünür.

(Bu nəsil adlarının haradan gəldiyi ilə maraqlananlar üçün qeyd edək ki, ən son nəsil təsnifatında Pew Research-in məlumatlarına əsaslanırıq. Greatest Generation-dan əvvəlki dövrlər üçün isə Uilyam Straus və Nil Hau tərəfindən 1991-ci ildə yazılmış və gözlənilmədən böyük təsirə malik olmuş “Generations” kitabından istifadə edirik.)

Görünür, bunda Baby Boomer nəslinin də günahı var. ABŞ tarixinin ən böyük nəslinin kölgəsində qalan X nəsli Konqresə seçilmək üçün uyğun yaşda olan əhalinin (25 yaş və yuxarı şəxslərin) heç vaxt üçdə birindən çoxunu təşkil etməyib. Üstəlik, bu nəslin ən yüksək göstərici dövrü artıq geridə qalıb. Müqayisə üçün, Baby Boomer nəsli özünün pik dövründə həmin yaş qrupunun yarısını təşkil edirdi.

Millennial nəslinin əhali arasındakı payı da təxminən eyni səviyyəyə çatmışdı. Bəs niyə onlar siyasi baxımdan X nəslinin eyni yaşda olduğu dövrdəki göstəricilərini üstələyirlər?

Burada da səbəb, böyük ehtimalla, Baby Boomer nəslinin hakimiyyətinin uzunmüddətli təsiridir. Bu nəsil sayca o qədər böyük idi və hakimiyyəti o qədər uzun müddət əlində saxladı ki, X nəslinə siyasi arenada yer qalmadı. 2000-ci illərdə, X nəslinin siyasi yüksəliş dövründə, Konqresdə kifayət qədər boş yer yox idi. Baby Boomer nəslinin nümayəndələri nəhayət təqaüdə çıxmağa başlayanda isə Millennial nəsli artıq öz siyasi yüksəliş mərhələsinə qədəm qoyurdu.

X nəslinin üzərindəki bu bəxtsizlik zəncirinin qırılacağı da hələ bəlli deyil. Hər iki partiyada 2028-ci il prezident seçkiləri üçün adı hallanan əsas namizədlərin bir çoxu, o cümlədən Cey Di Vens və Corciya ştatından demokrat senator Con Ossoff, məhz Millennial nəslinin nümayəndələridir.

Zəhra Məmmədova