Paşinyan özünü Ermənistanın xilaskarı kimi təqdim etdi: “Ölkəni dar ağacına aparan yoldan çıxardım”
Ermənistanın Baş naziri Nikol Paşinyan ölkənin keçmiş siyasi kursunu sərt tənqid edərək, Ermənistanı fəlakətə aparan yoldan məhz özünün döndərdiyini bildirib.
TodayPress TV xəbər verir ki, erməni KİV-lərinin yaydığı məlumata görə, Paşinyan çıxışı zamanı ona qarşı səsləndirilən ittiham və təhqirlərə baxmayaraq, ölkənin istiqamətini dəyişmək üçün kifayət qədər siyasi iradəyə sahib olduğunu vurğulayıb.
"Gəlmişəm ki, sizə xəbər verim: bəli, təhqirlərə, müxtəlif ittihamlara baxmayaraq, məndə o qədər iradə var idi ki... Mən Ermənistanı dar ağacına aparan yoldan çıxardım”, – deyə Baş nazir bildirib.
Paşinyan qeyd edib ki, ölkənin “eşafota aparıldığını” gördüyü üçün bu məsuliyyəti öz üzərinə götürmək qərarı verib.
Türkan İsgəndərli
