ABŞ El Paso hava məkanının bağlanması qərarını ləğv etdi

ABŞ Federal Aviasiya Administrasiyası hava məkanını 10 gün müddətinə bağlayacağını elan etdikdən bir neçə saat sonra Texasın El Paso şəhərinə uçuşlara qoyulan qadağanın ləğv edildiyini açıqladı.

TodayPress TV xəbər verir ki, bu barədə administrasiya öz veb saytında dərc edilmiş açıqlamada məlumat verib.

Bəyanatda El Paso Beynəlxalq Hava Limanı ətrafındakı hava məkanının xüsusi təhlükəsizlik səbəbləri ilə 10 gün müddətinə bağlanacağı, müvəqqəti bağlanmanın Meksika hava məkanını əhatə etmədiyi və əlavə təfərrüatların verilmədiyi bildirilib.

Uçuş qadağasının aviaşirkətlərin əməliyyatlarında ciddi pozuntulara səbəb olacağı müzakirə edilsə də, Federal Aviasiya Administrasiyası qadağanın elan edilməsindən bir neçə saat sonra El Paso üzərindəki hava məkanının müvəqqəti bağlanmasının ləğv edildiyini qeyd edib.

Bəyanatda bölgədə kommersiya aviasiyası üçün heç bir təhlükə olmadığı və bütün uçuşların normal davam edəcəyi vurğulanıb.

“CNN”in məlumatına görə, ABŞ administrasiyasının rəsmisi Meksika kartellərinə məxsus pilotsuz uçuş aparatlarının (PUA) ABŞ hava məkanını pozduğunu bildirib. Rəsmi şəxs El Paso hava məkanının bağlanmasının bundan qaynaqlandığını və ABŞ Müdafiə Nazirliyinin PUA-lara qarşı tədbir gördüyünü qeyd edib.

Aysel Mətləb

TodayPress TV