"Şəhərsalma və Memarlıq İli" ölkəmizə hansı töhfələri verəcək?

"Azərbaycanda 2026-cı ilin “Şəhərsalma və Memarlıq İli” elan edilməsi memarlıq və şəhərsalma sahəsində geniş perspektivlər vəd edir". 

Bu fikirləri memar Cahid Həsənov TodayPress TV-yə danışarkən bildirib.

Onun sözlərinə görə, 2026-cı il yalnız dövlət layihələrinin maliyyələşdirilməsi ilə məhdudlaşmayacaq, eyni zamanda digər qurum və təşkilatların da Azərbaycan memarlığının inkişafına və yenilikçi ideyaların reallaşmasına töhfə verməsinə imkan yaradacaq:

"Bu qərar təkcə mənim kimi memarları yox, bütün Azərbaycan cəmiyyətini sevindirdi. Çünki 2026-cı il artıq sadəcə dövlət layihələrinin maliyyələşdirilməsindən ibarət olmayacaq. Digər qurum və təşkilatlar da memarlığın inkişafına, yeni ideyaların reallaşmasına şərait yaradacaq".

Memar vurğulayıb ki, “Şəhərsalma və Memarlıq İli” çərçivəsində əsas məqsəd yalnız hündürmərtəbəli binaların tikintisi deyil, daha yaradıcı və innovativ yanaşmaların təşviq olunmasıdır. Onun fikrincə, özəl şirkətlər, memarlar, dizaynerlər və mühəndislər üçün sərbəst yaradıcılıq mühiti formalaşacaq və standart, monoton tikililərdən uzaqlaşmaq mümkün olacaq:

"2026-cı ildə Azərbaycanın şəhərsalma siyasətində “yaşıl şəhər” konsepti xüsusi yer tutacaq. İşğaldan azad olunmuş ərazilərin iqlim və coğrafi xüsusiyyətləri bu yanaşma üçün əlverişlidir. Yeni yaşayış məntəqələri fundamental olaraq "yaşıl şəhər" anlayışına uyğun qurulacaq. Yaşıllıq zolaqları, parklar, açıq məkanlar və ekoloji cəhətdən təmiz infrastrukturlar ön planda olacaq".

Mütəxəssis əlavə edib ki, bu dəyişikliklər Bakı şəhərində də özünü göstərəcək. Dövlət qurumlarının binalarının fasadları estetik tələblərə uyğun yenilənəcək, yaşıllıq sahələri artırılacaq, mini parklar salınacaq. 

"Özəl sektorun, o cümlədən MTK-ların da bu prosesdə aktiv iştirakı gözlənilir. "Şəhərsalma və Memarlıq İli" təkcə qısa müddətli layihələrlə məhdudlaşmayacaq, uzunmüddətli iqtisadi və sosial təsirlərə malik olacaq. Layihələrin davamlı həyata keçirilməsi minlərlə memar, mühəndis, dizayner layihəçi üçün yeni iş imkanları yaradacaq. 2026-cı il görüləcək işlər onilliklər boyu davam edəcək və ölkəmizi tamamilə yeni bir memarlıq dövrünə çıxaracaq", - deyə Cahid Həsənov vurğulayıb.

Heykəltəraş Elxan Zeynalov da TodayPress TV-yə fikirlərini bildirib.

Onun sözlərinə görə, 2026-cı il Azərbaycan üçün təkcə rəsmi bir tarix deyil, həm də son illərdə həyata keçirilən siyasi və sosial proseslərin məntiqi davamıdır:

"Mən düşünürəm ki, 2026-cı il Azərbaycan üçün çox mühüm bir il olacaq. Bu, yalnız dövlətimiz üçün deyil, bütün xalqımız üçün önəmli bir dönəm olacaq. Qarabağın yenidən qurulması, əhalinin doğma torpaqlara qayıdışı və rahat yaşayışın təmin olunması baxımından şəhərlərin düzgün planlaşdırılması və yüksək səviyyəli memarlıq layihələrinin hazırlanması əsas prioritetlərdəndir". 

Heykəltəraş qeyd edib ki, son illərdə Qarabağda həyata keçirilən layihələr bu sahədə ciddi irəliləyişlərin olduğunu göstərir:

"Bu prosesdə həm tarixi abidələrin qorunması, həm də müasir və komfortlu yaşayış məkanlarının yaradılması paralel şəkildə aparılmalıdır. Memarlıq və incəsənət bir-birini tamamlayan sahələrdir və hər bir layihə estetik zövq və peşəkarlıq tələb edir. Bu illərdə həm tarixi abidələr qorunur, həm də müasir yaşayış məkanları yaradılır. Memarlıq və incəsənət ayrılmaz sahələrdir. Binaların fasadı, interyeri və ümumi konstruksiyası böyük zövq və bacarıq tələb edir".

Elxan Zeynalov həmçinin Azərbaycanda memarlıq təhsilinin inkişaf etdiyini, ADA Universitetində memarlıq ixtisasının açılmasını, Memarlıq və İnşaat Universitetində, Rəssamlıq Akademiyasında və Naxçıvan Dövlət Universitetində aparılan tədrisi bu sahənin gələcəyi üçün mühüm addımlar kimi qiymətləndirib. Bu amillər 2026-cı ildə memarlıq sahəsində daha möhtəşəm nəticələrin əldə olunmasına zəmin yaradacaq.

"Abidələr və heykəltəraşlıq da “Şəhərsalma və Memarlıq İli”nin ayrılmaz tərkib hissəsi olmalıdır. Xüsusilə Qarabağda tarixi şəxsiyyətlərin və real qəhrəmanların xatirəsini əbədiləşdirən abidələrin ucaldılması gələcək nəsillər üçün mühüm mesaj daşıyacaq. Bizim xalqımızın real qəhrəmanları var. Onların fəaliyyəti, şücaəti və yaradıcılığı abidələr və memarlıq nümunələri vasitəsilə gələcək nəsillərə ötürülməlidir. 2026-cı il, mənim düşüncəmə görə, Azərbaycan üçün yalnız memarlıq ili deyil, həm də milli qürur, yaradıcılıq və gələcəyə inam ili olacaq", - Elxan Zeynalov fikrini tamamlayıb.

Türkan İsgəndərli

TodayPress TV