Hicran Hüseynova: “Quranda qadın–kişi hüquq bərabərliyi açıq şəkildə təsbit olunub”

“Biz dünyəvi dövlətik. Eyni zamanda çoxmilyonlu müsəlman dünyasına aidik. Bu amil qadın hüquqlarının müdafiəsində, hüquq bərabərliyinin təmin edilməsində, ailədaxili münasibətlərin və mənəvi dəyərlərin formalaşmasında aydın şəkildə özünü göstərir”.

TodayPress TV xəbər verir ki, bu fikirləri Milli Məclisin Ailə, qadın və uşaq məsələləri komitəsinin sədri Hicran Hüseynova Bakıda keçirilən Azərbaycan Din Xadimlərinin II Forumunda “Qadınların sosial və mənəvi inkişafında dini icmaların rolu” mövzusunda panel müzakirəsi zamanı səsləndirib.

O qeyd edib ki, İslam dininin və Müqəddəs Quranın qadına verdiyi dəyəri anlamaq üçün tək bir nümunə kifayətdir. Hicran Hüseynova Qurani-Kərimdə yer alan “Kişilərin qadınlar üzərində şəriətə görə hüquqları olduğu kimi, qadınların da onlar üzərində hüquqları vardır” ayəsini xatırladaraq bildirib ki, İslam dini bəşər tarixində qadına bərabər münasibətin əsasını qoyan ilk dəyər sistemlərindəndir:

“Bu yanaşma BMT-nin “Qadınlara münasibətdə ayrı-seçkiliyin bütün formalarının ləğv edilməsi haqqında” Konvensiyasına, eləcə də Azərbaycan Respublikası Konstitusiyasında təsbit olunmuş bərabərlik hüququna tam uyğundur. Onun sözlərinə görə, bu faktlar bir daha sübut edir ki, insan hüquq və azadlıqları ilə bağlı beynəlxalq və milli qanunvericilik prinsipləri Müqəddəs Quranın ayə və surələri ilə paralellik təşkil edir.

Hicran Hüseynova bildirib ki, bu baxımdan dini icmalar qadınların sosial və mənəvi inkişafında mühüm rol oynaya bilər. O qeyd edib ki, ilk növbədə maarifləndirmə işi gücləndirilməli, qadınların ailədə, cəmiyyətdə və iş həyatında hüquqları barədə məlumatlandırma aparılmalı, onların sosial fəallığı təşviq edilməlidir.

Onun sözlərinə görə, ailə dəyərlərinin qorunması, nikah münasibətləri, uşaq tərbiyəsi məsələlərində hüquqi və dini normaların birgə təbliği xüsusi əhəmiyyət daşıyır. Eyni zamanda qadın və qızların sosial, iqtisadi və mədəni sahələrdə iştirakını artırmaq üçün davamlı layihələr həyata keçirilməli, onlara sosial dəstək göstərilməlidir.

Komitə sədri vurğulayıb ki, dini icmalar qadınların həm şəxsiyyət kimi formalaşmasında, həm də cəmiyyətin inkişafına töhfə verməsində katalizator rolunu oynaya bilər. O əlavə edib ki, maarifləndirmə işi yalnız qadın və qızlar arasında deyil, kişilər arasında da aparılmalıdır ki, nəticə daha effektiv və davamlı olsun.

Sonda Hicran Hüseynova panelin tanınmış ictimai-siyasi xadimlər və elm sahəsində öz yeri olan qadınların iştirakı ilə davam etdiriləcəyini bildirib.

Qiymət Mahir

TodayPress TV