Rusiya Prezidenti Düşənbədə yeni reallıqla barışmağa məcbur qaldı – Ramiz Yunus AÇIQLADI

“18 oktyabr doğma vətənim Azərbaycanda ölkənin SSRİ-dən dövlət müstəqilliyinin bərpası günü kimi rəsmi şəkildə qeyd olunur”.

TodayPress TV xəbər verir ki, Xəzər Universitetinin siyasi elmlər üzrə professoru Ramiz Yunus bunu öz “Facebook” hesabında yazıb.

O qeyd edib ki, bu qərar 1991-ci ilin oktyabrında parlament tərəfindən konstitusiya səviyyəsində təsbit edilib və Azərbaycanı 1918-ci il 28 maydan 1920-ci il 28 aprelədək mövcud olmuş Azərbaycan Xalq Cümhuriyyətinin hüquqi varisi kimi tanıyıb:

“Həmin tarixdən sonra Azərbaycanın uzunmüddətli sovet işğalı dövrü başlanıb. 27 sentyabr 2020-ci ilə qədər azərbaycanlıların şüurunda “müstəqillik” anlayışı daha çox formal məna daşıyırdı, çünki Birinci Qarabağ müharibəsindən sonra ərazimizin 20 faizi Rusiyanın dəstəyi ilə Ermənistan tərəfindən işğal edilmişdi. 2020-ci ildə Azərbaycan Ordusunun Qələbəsindən, ardınca isə 19 sentyabr 2023-cü il tarixində həyata keçirilən bir günlük antiterror əməliyyatından və 15 oktyabr 2023-cü ildə Azərbaycan Prezidenti İlham Əliyevin Xankəndidə Azərbaycan bayrağını ucaltdığı gün ölkənin suverenliyi və ərazi bütövlüyünün tam bərpasından sonra “Azərbaycanın dövlət müstəqilliyinin bərpası” anlayışı həm forma, həm də məzmun baxımından özünün tam mənəvi və real mahiyyətini 100 faiz tapdı”.

Professor əlavə edib ki, son beş ildə regionun bütün status-kvosu tamamilə dəyişib və bu geosiyasi proses təkcə regional səviyyədə deyil, həm də onun hüdudlarından çox-çox uzaqlarda öz əksini tapmaqdadır:

“Bunun üçün sadəcə Azərbaycanın ABŞ ilə hazırkı münasibətlərinə, xüsusilə ABŞ Prezidenti Donald Tramp və Azərbaycan Prezidenti İlham Əliyev arasında formalaşmış qarşılıqlı hörmətə əsaslanan şəxsi əlaqələrə baxmaq kifayətdir. Həmçinin Azərbaycan–Çin münasibətlərinin dinamikasına və Avropa İttifaqının Azərbaycanla bağlı siyasətində sürətlə dəyişən mühitə diqqət yetirmək lazımdır.

Azərbaycan–Rusiya münasibətlərinə gəldikdə isə, “rus sülhməramlılarının” Qarabağdan razılaşdırılmış vaxtdan əvvəl çıxarılmasını, Qroznı yaxınlığında Rusiyanın Azərbaycan mülki təyyarəsini vurmasından sonra iki ölkə arasında yaranmış siyasi böhranı və Azərbaycan Prezidenti tərəfindən dövlət maraqlarının müdafiəsində nümayiş etdirilən qətiyyət və prinsipiallığı xatırlatmaq kifayətdir. Məhz bu möhkəm iradə nəticəsində Rusiya Prezidenti Vladimir Putin Düşənbədə həmin reallıqla barışmağa məcbur qaldı. Bu faktın özü çox şeyi ifadə edir”.

R.Yunus Azərbaycan və İran münasibətlərində də ciddi dəyişikliklər baş verdiyini deyib. O bildirib ki, Tehran da regionda formalaşmış yeni status-kvonu və Bakının lider rolunu qəbul edib.

“Doğma Azərbaycanımın nailiyyətlərini, xüsusən də son beş ildə əldə olunan uğurları çox sadalamaq olar. Lakin yuxarıda qeyd olunan faktlar kifayət qədər aydın göstərir ki, müasir Azərbaycan öz suverenliyini və dövlət müstəqilliyini qorumaq naminə bir yumruq kimi birləşmiş xalqın parlaq nümunəsidir.

18 oktyabr həm formaca, həm də məzmunca xalqımız üçün həqiqi bayram gününə çevrilib. Doğma vətənimi – Azərbaycanı Dövlət Müstəqilliyinin Bərpası Günü münasibətilə ürəkdən təbrik edirəm!” - deyə professor fikrini yekunlaşdırıb. 

Qiymət Mahir

TodayPress TV