Pakistan Ermənistanda səfirlik açır: Azərbaycanla razılaşdırılıb?

Gələn il Ermənistanda Pakistan Səfirliyinin açılması planlaşdırılıb.

Bu barədə “News.am” agentliyi diplomatik mənbələrə istinadən məlumat yayıb.

Bildirilib ki, hazırda iki ölkənin diplomatik nümayəndələri bununla bağlı fəal iş aparırlar.

Ermənistan Xarici İşlər Nazirliyi isə agentliyin sorğusuna rəsmi cavabında məlumatı təkzib etməyib: 

“Ermənistan və Pakistan arasında diplomatik münasibətlərin qurulması haqqında birgə kommünikeni imzalamaqla iki ölkə hökumətləri diplomatik nümayəndəliklərin mübadiləsinə və bir-birinə zəruri yardım göstərməyə razılaşıblar”.

Sözügedən məsələni TodayPress TV-yə şərh edən politoloq Rəşad Bayramov bildirib ki, Pakistan və Ermənistan arasındakı diplomatik əlaqələrin inkişafı çərçivəsində İrəvanda Pakistan səfirliyinin açılması ilə bağlı danışıqlar təbiidir:

“Məlumdur ki, Pakistan uzun illər ərzində Ermənistanın Azərbaycana qarşı təcavüzü səbəbilə Ermənistanla hər hansı diplomatik əlaqələr qurmayıb. İki ölkə arasında diplomatik münasibətlər yalnız 2025-ci ilin 31 avqustunda Çində imzalanmış kommünike ilə rəsmiləşdirilib. Başqa sözlə, 8 avqust Vaşinqton görüşündə Azərbaycan və Ermənistan arasında sülh sazişinin paraflanmasından sonra.

Odur ki, Pakistanın Ermənistanla diplomatik əlaqələr qurması uzun illər ərzində Azərbaycanla strateji müttəfiqlik prinsiplərinə zidd deyil. Əksinə, düşünürəm ki, Pakistan bu addımı Azərbaycanla razılaşdıraraq həyata keçirir. Bu baxımdan, İrəvanda səfirliyin açılması Azərbaycan–Pakistan dostluğuna və müttəfiqliyinə mənfi təsir göstərməyəcək. Pakistan bütün imkanları ilə istənilən platformada rəsmi Bakının mövqeyini müdafiə edən və Azərbaycanı dəstəkləyən ölkədir”.

Ekspert qeyd edib ki, səfirliyin açılması həm də Ermənistan–Pakistan əlaqələrini normallaşdırmaq, regionda diplomatik platformaları genişləndirmək baxımından mühüm addımdır:

“Lakin praktiki nəticələr baxımından bu təşəbbüs hazırda yalnız diplomatik maraqların nümayişi kimi qiymətləndirilə bilər. Həqiqi diplomatik və konsulluq fəaliyyətləri isə yalnız Ermənistanın seçkilərdən sonra göstərəcəyi davranışa bağlı olacaq. Səfirliyin gələn il açılmasının planlaşdırılması da bunun əyani sübutudur. Hər şey Ermənistandakı daxili siyasi vəziyyətdən və Azərbaycanla sülh prosesinin gedişatından asılı olacaq”.

R.Bayramovun fikrincə, Ermənistanda gələn il keçiriləcək seçkilərdən sonra Baş nazir Nikol Paşinyan hakimiyyəti Konstitusiya dəyişikliyi istiqamətində müvafiq addımlar atacaqsa, o zaman səfirliyin açılması da praktik olaraq mümkün olacaq. Əks halda, səfirliyin açılması sadəcə quru diplomatik bəyanatlardan o yana keçməyəcək. 

“Azərbaycan üçün bu proses həm də imkanları maksimum dərəcədə idarə etməyə şərait yaradır. Azərbaycanın dostlarının da Ermənistanda möhkəmlənməsi regionda diplomatik dinamikanın genişlənməsinə və bizim üçün əlavə təsir imkanları əldə etməyə imkan verir”, - deyə analitik fikrini yekunlaşdırıb.

Xatırladaq ki, bu il avqustun 31-də Ermənistan xarici işlər naziri Ararat Mirzoyan və pakistanlı həmkarı Məhəmməd İshaq Dar iki ölkə arasında diplomatik əlaqələrin qurulmasına dair birgə kommünike imzalayıblar.

Qiymət Mahir

TodayPress TV