Moskvanın "adamı" Paşinyana RƏQİBDİR – Seçki öncəsi XAOS

"Güclü Ermənistan" partiyasından ölkənin baş naziri postuna iş adamı Samvel Karapetyanın namizədliyi irəli sürülüb. 

Bəs, rusiyayönümlü Krapetyanın baş nazir postuna gəlmə ehtimalı nə qədərdir? 

Məsələ ilə bağlı politoloq Zeynal Əmrəliyev TodayPress TV-yə danışıb.

O qeyd edib ki, Ermənistanda hazırda Nikol Paşinyanın reytinqində müəyyən azalma müşahidə olunur. Lakin buna baxmayaraq, onun nüfuzu hələ də müxalifət nümayəndələrindən, o cümlədən Karapetyandan daha yüksəkdir: 

"Nikol Paşinyan burada müəyyən siyasi taktika tətbiq edir. Ölkədə parçalanma meyilləri güclənir. Məsələn, cəmiyyət əsasən Avropa İttifaqına və Qərbə inteqrasiyanı dəstəkləyən Paşinyan tərəfdarları ilə köhnə siyasi xətti müdafiə edən, əsasən kilsəni dəstəkləyən qüvvələr arasında bölünüb".

Ekspert vurğulayıb ki, Paşinyan son dövrlərdə bu bölünməni daha da dərinləşdirir. Bu isə ona sərf edir, çünki seçkilərdə tərəfdarlarının sayını artırmağa imkan verir. Ermənistanda hazırda heç bir siyasi qüvvəni açıq şəkildə dəstəkləməyən insanların sayı kifayət qədər çoxdur və Paşinyan cəmiyyətdəki bu qarşıdurmanı gücləndirməklə həmin elektoratı öz tərəfinə çəkməyə çalışır. 

Analitik diqqətə çatdırıb ki, Qərblə yaxınlaşma və Vensin səfəri Paşinyanın mövqeyini gücləndirir: 

"Son dövrlərdə ABŞ ilə Ermənistan arasında münasibətlərin yaxınlaşması, ümumilikdə Qərbin Ermənistana artan diqqəti və ölkə iqtisadiyyatına yatırılan sərmayələr də Paşinyanın şanslarını artıran amillər sırasındadır. Hesab edirəm ki, Vensin regiona son səfəri də Paşinyanın xeyrinə yazılan siyasi dividendlərdən biri olacaq".

Z.Əmrəliyev əlavə edib ki, Karapetyanın şansı zəifdir və rusiyameyilli düşərgədə parçalanma var:

"Bütün bunların fonunda faktiki olaraq Rusiyaya yaxın mövqe tutan, həmçinin kilsə tərəfindən dəstəklənən Karapetyanın Paşinyan qarşısında şansları o qədər də yüksək görünmür. Eyni zamanda nəzərə almaq lazımdır ki, Rusiya Ermənistanda təkcə Karapetyanı dəstəkləmir; burada “Qarabağ klanı” ilə əlaqəli siyasi qüvvələr də mövcuddur. Məsələn, “Qarabağ klanı”nın keçmiş liderləri Robert Köçəryan və Serj Sarkisyan kimi fiqurlar da müəyyən siyasi proseslərə təsir göstərə və rusiyameyilli qüvvələr arasında parçalanma yarada bilərlər".

O, sonda bildirib ki, müxalifətin bu cür parçalanması isə Paşinyanın mövqelərini daha da gücləndirir: 

"Ümumilikdə mümkündür ki, əvvəlki seçkilərlə müqayisədə onun topladığı səs faizi azalsın və hətta koalisiya hökuməti formalaşdırmaq zərurəti yaransın. Lakin hesab edirəm ki, bu seçkilərdə də Nikol Paşinyan qalib gələcək".  

Qeyd edək ki, "Rusiyanın adamı" hesab edilən Karapetyan 2025-ci ilin iyun ayında həbs edilib. İş adamına qarşı "vəzifə səlahiyyətlərindən və ya təsir gücündən istifadə etməklə külli miqdarda çirkli pulların yuyulması" ittihamı ilə cinayət işi açılıb. 2025-ci ilin dekabr ayının sonlarında o, ev dustaqlığına buraxılıb.  

Jalə Rövşən

TodayPress TV