ƏƏSMN nümayəndə heyəti 33-cü Avropa Sosial Konfransında iştirak edir

Əmək və Əhalinin Sosial Müdafiəsi Nazirliyinin tabeliyindəki DOST Agentliyi və Sosial Xidmətlər Agentliyinin nümayəndələrindən ibarət heyət Avropa Sosial Şəbəkəsinin 33-cü Avropa Sosial Konfransında iştirak edir.

Bu barədə TodayPress TV-yə ƏƏSMN-dən məlumat verilib.

Danimarkanın Orhus şəhərində keçirilən tədbir “Qayğı texnologiyanı tamamlayanda” mövzusuna həsr olunub.

DOST Agentliyinin İdarə Heyətinin sədri Fərid Məmmədov və Sosial Xidmətlər Agentliyinin İdarə Heyətinin sədri Vüqar Behbudov konfrans çərçivəsində Avropa Sosial Şəbəkəsinin sədri Kristian Fillet, habelə bir sıra ölkələrin sosial müdafiə qurumlarının rəhbər şəxsləri ilə görüşlər keçiriblər.

Görüşlər zamanı Azərbaycanda son illər aparılan sosial islahatların uğurları, DOST konsepsiyasının üstünlükləri, Sosial Xidmətlər Agentliyinin fəaliyyət istiqamətləri, həssas qruplara göstərilən sosial xidmətlərə dair məlumat verilib. Bu sahələrdə gələcək əməkdaşlığa dair fikir mübadilələri aparılıb.

Konfransda Fərid Məmmədov DOST Agentliyinin ümumi təcrübəsi ilə yanaşı, “DOST Tələbə Akselerasiya Proqramı: əlilliyi olan tələbələrin sosial-iqtisadi inkişafına dəstək” mövzusunda çıxış edib.

Qeyd olunub ki, əlilliyi olan gənclərin məşğulluq bacarıqlarının artırılması, müvafiq təcrübə imkanlarının yaradılmasına xidmət edən Proqramda əlilliyi olan 70-dən artıq gənc iştirak edib və məmnunluq dərəcəsi 100 faiz olub. Proqramın daimi tətbiqi, tələbə və işəgötürənlər arasında daha səmərəli əlaqənin təmin edilməsi üçün rəqəmsal platformanın qurulması nəzərdə tutulur.

33-cü Avropa Sosial Xidmətlər Konfransı sosial xidmətlərin transformasiyasında  rəqəmsallaşma ilə yanaşı, fərdi inkişaf və sosial əlaqələrin dəstəklənməsi, təcrübə mübadiləsi və transformasiya üzrə yeni ideyaların formalaşmasına həsr olunub. Avropa Sosial Şəbəkəsinin iştirakçı sayı 1000-ə yaxınlaşan əsas illik tədbiri olan Konfrans sosial xidmət sahəsində yenilikləri bölüşmək imkanı verir.

Qeyd edək ki,  Əmək və Əhalinin Sosial Müdafiəsi Nazirliyinin tabeliyindəki DOST Agentliyi 2021-ci ildən, Sosial Xidmətlər Agentliyi və Dövlət Məşğulluq Agentliyi 2023-cü ildən Avropa Sosial Şəbəkəsinin üzvüdürlər.

DOST Agentliyinin İdarə Heyətinin sədri Fərid Məmmədov 2021-ci ilin mart ayında səsvermə hüququ ilə Avropa Sosial Şəbəkəsinin Şura üzvü, 2023-cü ilin dekabr ayında isə 3 il müddətinə bu qurumun Himayədarlar Şurasının üzvü seçilib.