YAPONİYA QRAN-PRİSİ NƏFƏS KƏSDİ – QƏZA, DRAM VƏ QƏLƏBƏ!

“Formula-1” üzrə Yaponiya Qran-prisi dramatik hadisələr və gözlənilməz dönüşlərlə yadda qaldı.

Dünya çempionatının üçüncü mərhələ yarışında ardıcıl ikinci qələbəsini qazanan “Mercedes”in gənc pilotu Andrea Kimi Antonelli cari mövsümdə liderliyini möhkəmləndirərək tarixə ən gənc lider kimi düşdü.

“FORMULA-1”DƏ DRAMATİK YARIŞ: HƏR ŞEY BİR ANDA DƏYİŞDİ!

Yarışın taleyinə “Haas” pilotu Oliver Bermanın qəzası ciddi təsir göstərib. Hadisədən sonra trasda təhlükəsizlik maşını (safety car) peyda olub və bu, yürüşün strategiyasını Antonellinin xeyrinə dəyişib.

Startda liderliyi ələ alan “McLaren” sürücüsü Oskar Piastri uzun müddət birinci yeri qorusa da, safety-car sonrası üstünlüyünü itirib və yarışı ikinci pillədə başa vurub. Bu nəticə “McLaren” üçün cari mövsümdə ilk podium olub.

“Mercedes” pilotu Corc Rassell isə yarışın gedişində liderliyə yüksəlsə də, restartdan sonra tempini qoruya bilməyib və hətta podiumdan kənarda qalıb.

Eyni zamanda Şarl Lekler “Ferrari”də uğurlu çıxış edərək həm Rasselli, həm də komanda yoldaşı Lyuis Hemiltonu geridə qoyub və üçüncü yeri tutub.

Yarışın taleyinə qəzası ilə damğasını vuran Berman isə xoş təsadüf nəticəsində sınıqlardan yayınıb. Onun vəziyyətinin qənaetbəxş olduğu bildirilir.

ÇEMPİONATDA LİDER DƏYİŞDİ – ANTONELLİ ZİRVƏDƏ

“Formula-1” mövsümündə son yarışdan sonra ümumi sıralamada ciddi dəyişikliklər baş verib.

Ardıcıl ikinci qələbəsini qazanan Andrea Kimi Antonelli çempionatın yeni liderinə çevrilib və komanda yoldaşı Corc Rasselli 9 xal qabaqlayır.

İlk dördlükdə dəyişiklik olmayıb – Şarl Lekler və Lyuis Hemilton müvafiq olaraq 3-cü və 4-cü yerlərdə qərarlaşıb. Lando Norris 5-ci pilləyə yüksəlib, Oskar Piastri isə 6-cıdır.

Oliver Berman 7-ci yerə geriləyib, Pyer Qasli isə 8-ci pillədədir. Bundan başqa, Qabriel Bortoleto Karlos Saynsı qabaqlayıb, Esteban Okon isə Franko Kolapintonu geridə qoyub.

Ümumi sıralama:

1. Andrea Kimi Antonelli (“Mercedes”) — 72 xal. 

2. Corc Rassell (“Mercedes”) — 63. 

3. Şarl Lekler (“Ferrari”) — 49. 

4. Lyuis Hemilton (“Ferrari”) — 41. 

5. Lando Norris (“McLaren”) — 25. 

6. Oskar Piastri (“McLaren”) — 21. 

7. Oliver Berman (“Haas”) — 17. 

8. Pyer Qasli (“Alpine”) — 15. 

9. Maks Ferstappen (“Red Bull”) — 12. 

10. Liam Louson (“Racing Bulls”) — 10. 

11. Arvid Lindblad (“Racing Bulls”) — 4. 

12. İsak Hadjar (“Red Bull”) — 4. 

13. Qabriel Bortoleto (“Audi”) — 2. 

14. Karlos Sayns (“Williams”) — 2. 

15. Esteban Okon (“Haas”) — 1. 

16. Franko Kolapinto (“Alpine”) — 1. 

17. Niko Hülkenberq (“Audi”) — 0. 

18. Aleks Albon (“Williams”) — 0. 

19. Valtteri Bottas (“Cadillac”) — 0. 

20. Serxio Peres (“Cadillac”) — 0. 

21. Fernando Alonso (“Aston Martin”) — 0. 

22. Lens Stroll (“Aston Martin”) — 0.

“FORMULA-1”DƏ NADİR HADİSƏ: QALİB ŞAMPAN İÇMƏDİ!

“Formula-1” üzrə Yaponiya Qran-prisinin qalibi, “Mercedes” komandasının pilotu Andrea Kimi Antonelli podiumda ənənəvi şampan mərasimində iştirak edə bilməyib.

Buna səbəb Kiminin yaşı olub. 19 yaşlı italiyalı pilot Yaponiya qanunlarına görə spirtli içki qəbul etmək üçün tələb olunan 20 yaş həddinə çatmayıb.

Nəticədə Antonelli podiumda Şarl Lekler (“Ferrari”) və Oskar Piastri (“McLaren”) ilə birlikdə şampan səpmək və içmək əvəzinə, içərisində spirtsiz qazlı içki (ehtimal ki, çəhrayı su) olan xüsusi butulkadan istifadə edib.

Qeyd edək ki, yarış “Suzuka” trasında baş tutub və Antonelli möhtəşəm performansla birinci yeri tutub.

Xatırladaq ki, Yaponiyada yetkinlik yaşı 2022-ci ildə 18-ə endirilsə də, spirtli içki qəbulu üçün minimum yaş həddi hələ də 20 olaraq qalır.

Namiq HUN