“Nyukasl”ın alman ulduzu tənqidçiləri susdurur

“Nyukasl” klubunun və Almaniya millisinin hücumçusu Nik Voltemade özünə qarşı tənqidlərə cavab verib və səsləndirilən iddialarla razılaşmadığını bildirib.

TodayPress TV xəbər verir ki, o, bu barədə “talkSPORT” nəşrinə açıqlama verib. 

“Əgər kimsə deyirsə ki, mən durğunluq dövründəyəm, cavab verərdim ki, bu insan “Nyukasl”ın oyunlarının çoxunu izləməyib. İnsanlar məni qol sayları ilə bağlayır, amma hücumçu ilə 50, 60, 70 metr uzaqdan oynayan yarımmüdafiəçi ilə nəticəliliyi müqayisə etmək düzgün deyil. İndiki anda mənim oyunum döyüşləri necə qazandığım və sahədə necə boşluq yaratdığımla qiymətləndirilməlidir. Təbii ki, indi daha az qol vururam. Amma uzun müddətdə belə fazaları aşmağı öyrənsəm, bu məni daha güclü edəcək”, - deyə Voltemade bildirib.

Qeyd edək ki, Voltemade ötən yay “Nyukasl”a Aleksander İsakın əvəzinə transfer olunub. O, İngiltərə çempionatında dörd ay ərzində beş qol vurub, dekabrda iki dəfə fərqlənib və sonra qol vurmaqda fasilə verib. Bu il Voltemadenin aktivində yalnız İngiltərə Kubokunda vurduğu bir qol var.

Kapitan Bruno Gimaraynz zədələndikdən sonra almaniyalı futbolçu 4-3-3 sistemi üzrə hücumun ön xəttindən sol yarımmüdafiə mövqeyinə keçib ki, bu da nəticəliliyə təsir göstərib.

Namiq HUN

TodayPress TV