“Mançester Yunayted” Maquayra güvənməyə davam edir

İngiltərənin “Mançester Yunayted” klubunda müdafiəçi Harri Maquayr ilə müqavilənin uzadılması ilə bağlı açıqlama verilib.

TodayPress TV xəbər verir ki, klubun idman direktoru Ceyson Uilkoks bu qərarı şərh edib. 

O bildirib ki, Maquayr komanda üçün vacib keyfiyyətləri özündə birləşdirir:

“Harri “Mançester Yunayted” üçün oynamaq üçün lazım olan mentaliteti və dözümlülüyü təcəssüm etdirir. O, komandamıza dəyərli təcrübə və liderlik gətirən əsl peşəkardır.

Harri, klubdakı hər kəs kimi, “Mançester Yunayted”in davamlı uğur qazanmasına kömək etmək üçün tam motivasiyalıdır”.

Qeyd edək ki, 33 yaşlı müdafiəçi ilə yeni müqavilə 2027-ci ilin yayına qədər nəzərdə tutulub və əlavə bir il uzadılma imkanı da var.

Harri Maquayr 2019-cu ildən “Mançester Yunayted”də çıxış edir. O, bu müddət ərzində 266 oyunda meydana çıxıb və İngiltərə Liqa Kuboku ilə yanaşı, ölkə kubokunu da qazanıb.

Namiq HUN

TodayPress TV