Fabreqas Qış Olimpiadası ərəfəsində Olimpiya estafetinə qatıldı

İtaliyanın “Komo” klubunun baş məşqçisi Sesk Fabreqas Olimpiya məşəlinin estafetində iştirak edib.

TodayPress TV xəbər verir ki, bu barədə klubun mətbuat xidməti X (Twitter) sosial şəbəkəsində məlumat yayıb.

İspan mütəxəssis Olimpiya məşəlini Komo şəhərinin küçələri ilə daşıyıb. 

XXV Qış Olimpiya Oyunlarının açılış mərasimi 6 fevral tarixində Milanda keçiriləcək. Oyunlara Milanla yanaşı, Kortina-d’Ampezzo şəhəri də ev sahibliyi edəcək.

Qeyd edək ki, 38 yaşlı Sesk Fabreqas 2024-cü ildən “Komo” klubunun baş məşqçisi vəzifəsində çalışır. Futbolçu karyerasını məhz bu klubda başa vuran Fabreqas 1 iyul 2023-cü ildə peşəkar futbolçu kimi çıxışını rəsmən dayandırdığını açıqlayıb. 

Fabreqas karyerası ərzində “Barselona”, “Arsenal”, “Çelsi” və “Monako” kimi klubların formasını geyinib. O, İspaniya millisinin heyətində 2010-cu il dünya çempionu, 2008 və 2012-ci illərdə isə Avropa çempionu olub.

Namiq HUN

TodayPress TV