AFFA-nın strateji planı: gənc futbolçular üçün böyük imkan

AFFA UEFA-dan ayrılan 6 milyondan çox vəsaiti xərcləyəcəyi istiqamətləri açıqlayıb.

TodayPress TV xəbər verir ki, qurumun hesabatına görə, UEFA-nın Hat-Trick Həmrəylik Proqramı çərçivəsində 2024/2025 və 2025/2026 mövsümləri üçün AFFA-ya ümumilikdə 6 milyon 435 min 438 manat ayrılıb.

Həmin vəsait aşağıdakı sahələrin inkişafına yönəldiləcək:

Müxtəlif yaş qrupları üzrə milli komandalar 

Yaş qrupları üzrə liqalar 

Grassroots proqramları 

Hakimlik və məşqçilik 

İnfrastruktur və digər sahələrin standartlarının yüksəldilməsi 

Bundan əlavə, FIFA-nın Forward Proqramı və digər inkişaf təşəbbüsləri çərçivəsində AFFA-ya 2 milyon 874 min 917 manat maliyyə dəstəyi ayrılıb.

Bu dəstək sayəsində gənc futbolçuların yetişdirilməsi, məşqçi potensialının artırılması, stadion və təlim-məşq bazalarının standartlarının yüksəldilməsi mümkün olacaq. Ayrılan vəsaitin strateji istifadəsi yerli futbolun davamlı inkişafını və beynəlxalq standartlara uyğun idarəetmə sistemlərinin tətbiqini təmin edəcək.

Namiq HUN

TodayPress TV