Ağır yük maşınları NİYƏ RİSK yaradır? - AÇIQLAMA

Bir çox vətəndaşlar iri tonnajlı maşınların yollarda təhlükəli idarə edildiyini və qəzaların baş vermə səbəblərindən birinin də bu olduğunu bildirirlər. 

Nəqliyyat eksperti Adil Nəbiyev TodayPress TV-yə danışarkən bildirib ki, yük avtomobilləri, xüsusilə də KAMAZ tipli ağır tonnajlı nəqliyyat vasitələri yol hərəkətində xüsusi risk qrupu hesab olunur. 

Onun sözlərinə görə, bu maşınların ölçüləri böyük, manevr imkanları isə minik avtomobilləri ilə müqayisədə daha məhduddur. Buna görə də belə nəqliyyat vasitələrinin iştirakı ilə baş verən qəzalar çox vaxt ağır nəticələnir.

"Bu sahədə ilk növbədə texniki nəzarət və monitorinq sistemlərinin tətbiqi genişləndirilməlidir. Müasir yük avtomobillərində sürətə nəzarət edən elektron məhdudlaşdırıcılar, avtomatik əyləc sistemləri və sürücünün diqqətini izləyən sensorların quraşdırılması mümkündür. Bu texnologiyalar sürücünün yorğun və ya diqqətsiz olduğu hallarda qəza riskini xeyli azalda bilər".

Ekspert əlavə edib ki, iri tonnajlı avtomobillər üçün videomüşahidə və GPS nəzarət sistemlərinin tətbiqi də vacibdir. Bir çox ölkələrdə belə nəqliyyat vasitələrinin hərəkəti dispetçer mərkəzləri vasitəsilə izlənilir. Bu zaman sürətin normadan artıq olması, qəfil manevrlər və ya uzun müddət fasiləsiz idarəetmə kimi riskli hallar dərhal aşkar edilərək sürücüyə xəbərdarlıq olunur:

“Ağır yük avtomobilləri üçün xüsusi hərəkət qaydalarının tətbiqi də təhlükəsizliyə müsbət təsir göstərə bilər. Məsələn, bəzi ölkələrdə iri tonnajlı maşınların şəhər daxilində pik saatlarda hərəkəti məhdudlaşdırılır. Bu yanaşma həm yol sıxlığını azaldır, həm də belə nəqliyyat vasitələrinin piyadalar və minik avtomobilləri ilə toqquşma riskini minimuma endirir. Həmçinin sürücülərin peşə hazırlığı və psixoloji vəziyyətinin mütəmadi yoxlanılması vacibdir. Həmin şəxslər üçün davamlı təlimlər, tibbi və psixoloji yoxlamalar keçirilməsi zəruridir. Çünki bu tip nəqliyyat vasitələrinin idarə olunması daha yüksək məsuliyyət və peşəkarlıq tələb edir”.

O vurğulayıb ki, əlavə təhlükəsizlik avadanlıqlarının quraşdırılması da qəzaların qarşısının alınmasına kömək edə bilər. Belə ki, “Kor zona”nı göstərən sensorlar, 360 dərəcə kameralar və piyadanı aşkar edən sistemlər sürücüyə ətraf mühiti daha yaxşı görməyə imkan yaradır. Bu xüsusilə iri və hündür kabinalı avtomobillər üçün olduqca əhəmiyyətlidir.

"Yol infrastrukturu da bu məsələdə mühüm rol oynayır. Magistral və şəhər yollarında ağır tonnajlı nəqliyyat vasitələri üçün ayrıca zolaqların təşkili, dayanma və yükləmə yerlərinin düzgün planlaşdırılması qəzaların sayının azalmasına kömək edə bilər. Problemin həlli üçün texniki nəzarət, sürücü hazırlığı və yol hərəkətinin düzgün təşkili kimi amillər kompleks şəkildə tətbiq olunmalıdır", - deyə Adil Nəbiyev fikrini tamamlayıb. 

Qeyd edək ki, martın 6-da Bakı-Quba yolunun Saray qəsəbəsindən keçən hissəsində ağır yol-nəqliyyat hadisəsi baş verib. Belə ki, yük maşını avtomobilindən düşüb telefonla danışan müğənni Kamil Sərməsovu vurub və o, hadisə yerindəcə həyatını itirib. 

Türkan İsgəndərli