Rusiya İran-İsrail münaqişəsinə doğru: ABŞ ilə üz-üzə gələ gəlsə...

Təhlil

20.06.2025 13:23

“Rusiyanın İran-İsrail münaqişəsinə qoşulması hazırda mümkünsüzdür”.

Politoloq Vəli Əlibəyov bunu TodayPress TV-yə açıqlamasında deyib.

O, ABŞ-nin İsrailə dəstəyindən bəhs edib:

“Əslində, ABŞ-nin İsrailə açıq dəstək verməsi heç kəs üçün sirr deyil. Bəzi məlumatlara görə, İrana qarşı əməliyyatların ssenarisini İsrail birbaşa ABŞ ilə razılaşdırıb, ABŞ İsrailə bu istiqamətdə lazımi kəşfiyyat və metodiki dəstək göstərib. Amma o da həqiqətdir ki, ABŞ hələ ki, İrana qarşı hücumlarda birbaşa iştirak etmir. Hətta ABŞ bir neçə dəfə bununla bağlı rəsmi açıqlamalar da verib. Buna baxmayaraq, hadisələrin gedişatı onu göstərir ki, İranda hazırkı rejimi yıxmaq üçün İsrailin İranın hava məkanına sahib olması kifayət etməyəcək. Bunun üçün mütləq şəkildə yerüstü əməliyyatlar da həyata keçirilməlidir. İsrail havada nə qədər uğurlu olsa da, yerüstü əməliyyatda bunu təmin edə bilməyəcək. Bunun üçün mütləq şəkildə ABŞ silahlı qüvvələrinin iştirakı vacibdir”.

Ekspert bildirib ki, Rusiya ABŞ-nin müdaxiləsinin nə ilə nəticələnəcəyini anlayır:

“Rusiya xarici işlər nazirinin müavini Sergey Ryabkov da məhz buna işarə edir. O başa düşür ki, ABŞ-nin hərbi müdaxiləsi vəziyyəti kökündən dəyişər, İran rejimini yıxar və Rusiya öz müttəfiqlərindən birini itirə bilər. Əlbəttə, bu tək Rusiya üçün deyil, regionun digər ölkələri üçün də arzuolunan ssenari deyil. Rusiya da bunu əngəlləmək üçün xarici işlər nazirinin müavini adından belə bir xəbərdarlıq edir”.

Analitik Rusiyanın İran-İsrail münaqişəsinə qoşulmaq ehtimalını dəyərləndirib:

“Hazırkı vəziyyətdə bu, mümkünsüzdür. Rusiya Ukraynada ilişib qalıb və onu tam məğlubiyyətdən məhz Donald Trampın hakimiyyətə gəlişi xilas edib. Rusiya ABŞ əleyhinə gedərsə, daha böyük məğlubiyyətlə üzləşə bilər və Rusiyanın süqutu sürətlənər”.

Qeyd edək ki, Rusiya xarici işlər nazirinin müavini Sergey Ryabkov ABŞ-yə xəbərdaqlıq edərək bildirib ki, Vaşinqton İsrailə birbaşa hərbi yardım göndərərsə, bu, bütün vəziyyət üçün köklü sabitliyi pozan addım olacaq.

Qiymət Mahir