Britaniya Azərbaycanda qızıl hasilatı üzrə proqnozunu kəskin artırdı
Böyük Britaniyanın Azərbaycanda fəaliyyət göstərən mədən şirkəti "Anglo-Asian Mining Plc." 2025-ci ildə qızıl hasilatı üzrə proqnozunu 25-28 min unsiyaya qədər artırıb.
Bu barədə TodayPress TV-yə şirkətdən bildirilib.
Qeyd edilib ki, yeni mədənlərin – Gilar və Dəmirli yataqlarının istismara verilməsi fonunda "Anglo Asian"ın illik istehsal həcmi əhəmiyyətli dərəcədə artacaq. Şirkət həmçinin mis hasilatı üzrə proqnozunu bu il üzrə 8 100 – 9 000 tona kimi artırıb. Bu göstəricilər 2024-cü ilin real nəticələri ilə müqayisədə müvafiq olaraq 87% və 24 dəfə artım deməkdir. Ötən il şirkət cəmi 15 073 unsiya qızıl və 377 ton mis hasil etmişdi.
Hasilatda artım şirkətin dövriyyəsini 125 – 140 milyon ABŞ dollarına, əsas hasilat fəaliyyətindən gəlirlərini (EBITDA) isə 40 – 50 milyon ABŞ dollarına çatdıracaq.
Şirkət bildirib ki, Dəmirli yatağında hasilat iyul ayında başlayıb və zavod tam layihə gücünə çatmaq üzrədir. Gilar yatağında isə yüksək keyfiyyətli zonalardan hasilat aparılır — filizin tərkibi 3,5–4% mis və ton başına 2 qram qızıl təşkil edir. Bu səbəbdən “Gedabək” flotasiya zavodunda ikinci avtomatlaşdırılmış filtr pres quraşdırılıb və zavodun genişləndirilməsi üzrə işlər davam edir.
"Yüksək keyfiyyətli filiz hazırda anbara yığılır və 2026-cı ilin əvvəlində genişləndirilmiş zavodda emal ediləcək. Bu, həm 2025, həm də 2026-cı ilin hasilat göstəricilərinə müsbət təsir göstərəcək" - açıqlamada əlavə edilib.
Qeyd edək ki, “Anglo-Asian Mining” Azərbaycanda 1997-ci il avqustun 21-də imzalanmış PSA (Production Sharing Agreement/Hasilatın Pay Bölgüsü) tipli müqavilə çərçivəsində hasilatla məşğul olur. Müqavilədə Azərbaycanın payı 51 %, "Anglo-Asian Mining Plc." şirkətinin payı 49 % təşkil edir.
