Yəməndə bazar bombalandı, çox sayda ölən və yaralanan var

Yəmənin üsyançı “Ənsar Allah” hərəkatının husiləri ölkənin cənub-qərbində yerləşən Təiz əyalətindəki bazara Səudiyyə Ərəbistanının endirdiyi zərbə nəticəsində 30-dan çox insanın öldüyünü və yaralandığını bildiriblər.

TodayPress TV xəbər verir ki, bu barədə üsyançıların hökumətində Səhiyyə Nazirliyinin rəsmi nümayəndəsi Ənis əl-Əsbahi məlumat verib.

Bildirilib ki, Səudiyyəyə məxsus F-15 təyyarəsi Xamis-Muşayt bazasından havaya qalxaraq Təiz əyalətinin Əl-Vəziyə rayonundakı Əl-Hədara bazarına üç zərbə endirib. Nəticədə onlarla dinc sakin həlak olub və yaralanıb.

Əl-Əsbahi dəqiqləşdirib ki, hücum nəticəsində 30-dan çox insan zərər çəkib.

Öz növbəsində, Səudiyyə Ərəbistanının “Al Arabiya” telekanalı mənbələrə istinadən bazara zərbəni husilərin özlərinin ballistik raketdən istifadə etməklə endirdiyini bildirib.

Aysel Mətləb