Kitabla əlaqəsi olmayanlar ön plandadır - Etibar Əliyev

Keçmiş deputat, fəlsəfə doktoru Etibar Əliyev ölkədə kitab mühiti ilə bağlı tənqidi fikirlər səsləndirib. 

TodayPress TV xəbər verir ki, o, Ümumdünya Kitab və Müəlliflik Hüququ Günü münasibətilə keçirilən tədbirlərin formal xarakter daşıdığını bildirib və bir sıra problemlərə diqqət çəkib.

Onun sözlərinə görə, tədbirlərdə kitabla birbaşa əlaqəsi olmayan şəxslərin iştirakı üstünlük təşkil edir, çıxışlar isə daha çox pafoslu və təbliğat xarakterlidir:

""Ümumdünya Kitab və Müəlliflik Hüququ Günü"nü təmtəraqla qeyd etdik. Yenə də kitabla heç bir əlaqəsi olmayan adamları tədbirlərə dəvət etdilər. Bəlağətli çıxışlar oldu, kitab "vəsf" olundu. Ölkədə yalnız detektiv janrda yazılmış kitablar təbliğ olunur. Elmi-populyar ədəbiyyatların təşviqi isə çox aşağı səviyyədədir. Kitab mağazalarında bu istiqamətdə yazılmış ədəbiyyatlara toxunan belə yoxdur".

Keçmiş deputat uzun illər ərzində kitab mühitini müşahidə etdiyini bildirərək, bu sahədə peşəkarların aktiv görünmədiyini vurğulayıb:

"30 ildən çoxdur ki, mütəmadi olaraq kitab mağazalarına və bukinistlərə baş çəkirəm. Heç kim inciməsin, bu müddət ərzində belə məkanlarda alim, yazıçı, şairlə rastlaşmamışam".

O, uşaq ədəbiyyatının vəziyyətini də tənqid edib:

"Uşaqlar üçün yazılan şeirlər, hekayələr onların təfəkkürünü zənginləşdirmir. Bu sahə faktiki olaraq inhisara alınıb. Kitab mağazalarının yerləri satılıb. Rayonlarda demək olar ki, kitab mağazaları qalmayıb. Paytaxtda isə cəmi bir neçə bukinist mağaza mövcuddur və onlar da zirzəmi şəraitində fəaliyyət göstərir. Mütaliə etməyən orta məktəb müəllimi şagirdlərdə tənqidi təfəkkür formalaşdıra bilməz. Mütaliəsiz alimlər auditoriyalarda illər əvvəl hazırladıqları konspektlərdən dərs keçirlər".

Fəlsəfə doktoru cəmiyyətdə kitaba münasibətin dəyişdiyini də vurğulayıb:

"Kiməsə kitab hədiyyə etmək istehza ilə qarşılanır. "Heç kim heç kimin kitabını oxumur" sindromu artıq gerçəkliyə çevrilib. Şəxsi kitabxanalar yoxa çıxmaqdadır və bu, artıq nə alimləri, nə yazıçıları, nə də incəsənət adamlarını narahat edir".

Türkan İsgəndərli

TodayPress TV