Bəhruz Məhərrəmov: "Rusiya repressiya təfəkküründən qopa bilməyib"

"Rusiya Federal Təhlükəsizlik Xidmətinin (FTX) Yekaterinburqda azərbaycanlıların yaşadığı evlərə keçirdiyi xüsusi əməliyyatı zamanı soydaşlarımızın öldürülməsi, bəzilərinin ağır bədən xəsarətləri alması və 9 nəfərin saxlanılması heç bir halda cinayətkarlıqla mübarizə kimi təqdim oluna bilməz".

Milli Məclisin deputatı Bəhruz Məhərrəmov bunu TodayPress TV-yə danışarkən bildirib.

Onun sözlərinə görə, baş verənlər əksinə, dövlət strukturları tərəfindən törədilən cinayətdir:

"Rusiya güc strukturlarının gecə vaxtı dinc insanları evindən aparıb öldürməsi, yaralaması, beş il əvvəl Ermənistanın Gəncədə mülki sakinlərin yaşadığı binanı raket atəşinə tutması ilə mahiyyətcə eyni məzmuna gəlir. Bu hadisə Rusiyanın hələ də sovet totalitarizminin repressiya təfəkküründən qopa bilmədiyini və terrorla cəmiyyətlər üzərində nüfuz qurmağa çalışdığını göstərir".

Deputat qeyd edib ki, Azərbaycan Respublikası beynəlxalq hüquq normalarına əsaslanan, dostluq və əməkdaşlığa söykənən münasibətlərin tərəfdarı olaraq Rusiya ilə daim sülh şəraitində işləməyə çalışıb. Onun sözlərinə görə, Azərbaycan heç vaxt Rusiya əleyhinə yönələn proseslərdə iştirak etməyib və öz ərazilərindən Rusiya əleyhinə fəaliyyətlərə imkan verməyib.

"Bütün bu niyyətlərə baxmayaraq, Rusiyanın qonşuluq və dostluq münasibətlərinə zidd şəkildə davranması başadüşülən deyil və Moskva əmin ola bilər ki, bu cür barbar hərəkətlərlə ən azı Cənubi Qafqazda öz maraqlarına zərbə vurur”.

Bəhruz Məhərrəmov xatırladıb ki, Azərbaycan və Rusiya arasında 22 fevral 2022-ci il tarixində imzalanan Müttəfiqlik qarşılıqlı fəaliyyəti haqqında Bəyannamədə Moskva bu münasibətlərin bərabərhüquqlu əməkdaşlıq prinsipləri əsasında inkişaf etdirilməsinə sadiqliyini ifadə edib. Həmin sənədə görə, tərəflər diaspor təşkilatlarının fəaliyyətini təşviq etməyi, anlaşılmazlıqların qarşısının alınması üçün Xarici İşlər Nazirlikləri xətti ilə daimi məsləhətləşmələr mexanizmi yaratmağı öhdələrinə götürüblər.

"Belə məqamda sual meydana çıxır ki, bu kimi razılaşmaların və mexanizmlərin mövcud olduğu halda Rusiya güc strukturlarının “quldurcasına” davranışının təməlində nə dayanır, Azərbaycan nə vaxt Rusiya üçün müzakirə pəncərəsini bağlayıb? Biz hər zaman dialoqa hazır olmuşuq. Əgər Rusiyanın bu məsələdə “mövzusu” varsa, onu müzakirə etmək əvəzinə qaba üsullara əl atması dərin təəssüf doğurur”, - deyə deputat əlavə edib.

Bəhruz Məhərrəmov sonda qeyd edib ki, hazırda beynəlxalq aləmdə təklənən vəziyyətdə olan Rusiya öz maraqlarını yalnız praqmatik və rasional siyasət yolu ilə qoruya bilər.

Türkan İsgəndərli