“Biz heç vaxt belə bir şey görməmişik”: Kainatdakı sirli parıltı

2006-cı ildə astronomlar gözlənilməz hadisə ilə qarşılaşdılar. NASA-ya məxsus Hubble Space Telescope səmanın boş hesab olunan bir hissəsində naməlum parıltı qeydə aldı. Obyektə SCP 06F6 adı verildi. Maraqlısı isə bu idi ki, alimlər onun nə olduğunu və harada yerləşdiyini müəyyən edə bilmirdilər.

TodayPress TV xəbər verir ki,  bu barədə "Gazeta.ru" da məqalə dərc olunub. 

Məqalədə bildirilir k, parıltı "Boötes" bürcündə müşahidə olunmuşdu. Əvvəlcə bu hadisə adi fövqəlnova partlayışına bənzədildi. Lakin sonradan məlum oldu ki, obyekt adi fövqəlnovalardan fərqli davranır. Onun parlaqlığı təxminən 100 gün ərzində tədricən artdı, sonra isə növbəti 100 gün ərzində zəifləyərək yox oldu. Halbuki tipik fövqəlnovalar daha qısa müddətdə maksimum parlaqlığa çatır.

Əsas problem obyektin məsafəsini müəyyən etmək idi. Astronomlar adətən ulduz və qalaktikaların məsafəsini onların işıq spektrinə və qırmızı sürüşməsinə baxaraq hesablayırlar. Lakin SCP 06F6-nın spektri heç bir məlum nümunəyə uyğun gəlmirdi. Onun tərkibini və nə qədər uzaqda yerləşdiyini müəyyən etmək mümkün olmadı. Bu səbəbdən alimlər obyektin bizim qalaktikada, yoxsa milyardlarla işıq ili uzaqlıqda yerləşdiyini deyə bilmədilər.

Əgər o, həqiqətən də çox uzaqda idisə, deməli, son dərəcə güclü və fövqəladə parlaq partlayış baş vermişdi. Əgər yaxın məsafədə idisə, onda bu, tamamilə yeni və indiyədək müşahidə olunmamış bir kosmik hadisə ola bilərdi.

Alimlər müxtəlif ehtimallar irəli sürüblər: ağ cırtdanın qara dəlik tərəfindən parçalanması, qeyri-adi fövqəlnova partlayışı və ya başqa nadir kosmik proses. Lakin bu versiyaların heç biri tam sübuta yetirilməyib.

Bu günə qədər SCP 06F6-nın nə olduğu dəqiq bilinmir. Əgər o, yenidən müşahidə olunsa, alimlər üçün böyük imkan yaranar. Çünki elm təkrarlanan hadisələri öyrənməkdə daha uğurludur. Hələlik isə bu sirli parıltı kainatın açılmamış sirlərindən biri olaraq qalır.

Jalə Rövşən 

TodayPress TV