200 illik sirr çözüldü – Prezident Ceffersonun saç teli hər şeyi ifşa etdi...

Tomas Ceffersonun saç telləri üzərində aparılan müasir DNT analizi ABŞ-nin üçüncü prezidentinin köləlikdə saxlanılan Salli Heminqsin uşaqlarının atası olduğuna dair fövqəladə dərəcədə güclü sübutlar ortaya qoyub.

TodayPress TV “New York Post”a istinadən xəbər verir ki, “Smithsonian Institution”un tədqiqatçıları Ceffersonun bir neçə saç telindən əldə edilən genetik materialı Cefferson və Heminqsin nəslindən olduqları hesab edilən, hazırda yaşayan 13 şəxsin DNT nümunələri ilə müqayisə ediblər. Təxminən 15 il davam edən araşdırmada arxeoloqlar, şəcərə mütəxəssisləri, molekulyar genetiklər və tarixçilər iştirak edib. 

Ceffersonun Heminqsin uşaqlarının atası olması ilə bağlı şayiələr XIX əsrin əvvəllərindən yayılıb. Tədqiqatçılar indi bu əlaqəni təsdiqləyən inandırıcı genetik sübut əldə etdiklərini hesab edirlər.

Layihəyə rəhbərlik edən “Smithsonian Institution” tədqiqatçısı Riçard Kurin bildirib ki, bununla bağlı fərqli fikirlər mövcud ola bilər və institutun bu məsələ ilə bağlı rəsmi mövqeyi olmaya bilər. Lakin onun sözlərinə görə, əldə edilən sübutlar inandırıcıdır və nəticələr olduqca aydındır.

Araşdırma 2011-ci ildə Kurinin Ceffersonun şəxsi İncili haqqında sənədli film hazırladığı zaman başlayıb. Tədqiqatçılar kitabın səhifələrində prezidentin qan izlərini axtararkən üç saç teli aşkar ediblər. Lakin həmin saç tellərinin Ceffersonun ana tərəfdən qohumlarından birinə aid nümunə ilə uyğun gəlmədiyi müəyyənləşib.

Daha sonra alimlər Ceffersonun 1826-cı ildə Montiçellodakı malikanəsində ölüm yatağında başından kəsildiyi ehtimal olunan saç dəstəsi əldə ediblər. Bu nümunə prezidentin tam genomunun müəyyənləşdirilməsinə imkan verib.

Tədqiqatçılar, həmçinin müxtəlif atalıq ehtimallarını yoxlamaq üçün 20 min simulyasiya aparıblar. Bu zaman Ceffersonun qardaşı Rendolf və Rendolfun oğulları ilə müqayisələr həyata keçirilib. Nəticələrə əsasən, Ceffersonun Heminqsin Medison və İston adlı oğullarının atası olmaması ehtimalı mində birdən də az olub.

Bununla belə, araşdırma müəyyən mübahisələrə də səbəb olub. Bu ay Heminqsin 2015-ci ildə DNT nümunəsi təqdim edən nəslindən biri məlumatlarının layihədən çıxarılmasını istəyib. O, Kurinin kitabının müvafiq elmi məqalənin jurnalda dərc edilməsindən əvvəl işıq üzü görməsindən narazı qalıb.

“Smithsonian Institution” nümunənin və onunla bağlı məlumatların məhv edildiyini təsdiqləyib. Bundan sonra analiz həmin məlumatlar olmadan yenidən aparılıb.

Qiymət Mahir