"Yaşıl enerji" layihələrinin maliyyələşdirilməsi müzakirə edildi

Asiya İnkişaf Bankı (ADB) və Asiya İnfrastruktur İnvestisiya Bankı (AIIB) ilə Azərbaycanda "yaşıl enerji" layihələrinin maliyyələşdirilməsi perspektivləri müzakirə edilib.

TodayPress TV bu barədə Energetika Nazirliyinə istinadən xəbər verir.

Müzakirələr Filippinin Manila şəhərində ADB-nin təşkilatçılığı ilə “Gələcəyi gücləndirək: Təmiz enerji innovasiyaları, regional əməkdaşlıq və inteqrasiya, maliyyələşmə həlləri” mövzusunda keçirilən “2025-Asiya Təmiz Enerji Forumu” çərçivəsində aparılıb. Tədbirdə Azərbaycanı energetika nazirinin müavini Orxan Zeynalovun rəhbərlik etdiyi nümayəndə heyəti təmsil edib.

Səfər çərçivəsində Qazaxıstan, Özbəkistan və Qırğızıstan nümayəndələrinin, eləcə də Asiya İnkişaf Bankı və Asiya İnfrastruktur İnvestisiya Bankının iştirakı ilə Mərkəzi Asiya-Azərbaycan Yaşıl Enerji Dəhlizinə həsr olunmuş dəyirmi masada iştirak edilib. Tədbirdə enerji əlaqələrinin gücləndirilməsi, "yaşıl enerji" nəqli marşrutlarının inkişafı və bu sahədə çoxtərəfli əməkdaşlıq imkanları müzakirə olunub.

Bununla yanaşı, ADB-nin icraçı direktoru Rachel Thompson ilə də görüş baş tutub. Görüşdə Azərbaycanla ADB arasında enerji sahəsində mövcud əməkdaşlıq məsələləri, xüsusilə bərpa olunan enerji və enerji səmərəliliyi layihələrinə dair birgə fəaliyyət perspektivləri müzakirə olunub. Azərbaycanın "yaşıl enerji dəhlizləri"nin inkişafı istiqamətində gördüyü işlər və bu sahəyə investisiya qoyuluşunun dəstəklənməsi üçün maliyyə mexanizmləri ətrafında fikir mübadiləsi aparılıb.

Nazir müavini forum çərçivəsində "Mərkəzi, Qərbi və Şərqi Asiya regionunun birgə gələcəyi üçün Yaşıl Dəhlizlər" mövzusunda təşkil edilən paneldə çıxış edib. Çıxışda Azərbaycanın bərpa olunan enerji sahəsində hədəfləri, "yaşıl enerji"nin ixracı məqsədilə reallaşdırılan regionlararası infrastruktur layihələri və bu kontekstdə Asiya ölkələri ilə mümkün əməkdaşlıq imkanları barədə məlumat verilib. Eyni zamanda, Azərbaycanın ev sahibliyi etdiyi COP29 konfransı çərçivəsində elan edilmiş enerji təşəbbüslərinin "yaşıl keçid"in sürətləndirilməsi və beynəlxalq tərəfdaşlıq üçün yaratdığı imkanlar vurğulanıb.