Britaniya şirkəti Azərbaycanda qızıl hasilatını kəskin artırdı

Azərbaycan üzrə fəaliyyət göstərən və AIM birjasında listinqdə olan Böyük Britaniyanın qızıl, mis və gümüş hasilatçısı "Anglo Asian Mining" (AAM) şirkəti bu ilin ilk yarısında Azərbaycanda qızıl hasilatını kəskin artırıb.

TodayPress TV xəbər verir ki, şirkət 2025-ci ilin ilk yarısında qızıl hasilatını ötən ilin eyni dövrü ilə müqayisədə 2,5 dəfə artıraraq 12 115 unsiyaya çatdırıb.

Hesabata əsasən, cari ilin II rübündə qızıl hasilatı 6 086 unsiya təşkil edib ki, bu da ötən ilin eyni dövrü ilə müqayisədə 2,5 dəfə artım deməkdir (II rüb, 2024: 2 438 unsiya). Şirkətin ümumi hasilatı isə 8 293 qızıl ekvivalent unsiyası olub.

Artıma əsas səbəb may ayında istismara verilmiş Gilar mədəni olub. Qeyd edilir ki, Gilar yatağından rüb ərzində 106 510 ton filiz hasil edilib. Filizin orta tərkibi 1,23 qr/t qızıl və 0,84% mis təşkil edib.

Bununla yanaşı, mis hasilatı da kəskin artaraq ilin ilk yarısında 1 188 ton olub (I yarı 2024: 100 ton). Gümüş hasilatı isə 5 dəfə artaraq 62 354 unsiyaya çatıb.

Şirkət hesabat dövründə ümumilikdə 9 781 unsiya qızıl külçəsi satıb. Satışların orta qiyməti 3 077 ABŞ dolları olub. Yarımil ərzində AAM 1,8 milyon dollar müsbət pul axını formalaşdıraraq xalis borcunu 13,0 milyon dollara endirib.

Şirkətin baş direktoru Rza Vəziri bildirib ki, Gilar mədəni istismara veriləndən sonra hasilatda əhəmiyyətli artım müşahidə olunub. Onun sözlərinə görə, yaxın aylarda Demirli yatağında da hasilat işlərinə başlanılması planlaşdırılır ki, bu da şirkətin çox-aktivli hasilatçıya çevrilməsində mühüm rol oynayacaq.