Çempionlar Liqası: “Qarabağ”dan tarixi zəfər

“Qarabağ” dünyanın ən nüfuzlu klub turniri - UEFA Çempionlar Liqasının Liqa mərhələsinə qələbə ilə başladı. Azərbaycan futbolunun şəksiz lideri nəhənglərin baş-başa gəldiyi yarışa tarixi qələbə ilə start verdi.

“Qarabağ” Çempionlar Liqasının Liqa mərhələsində ilk qələbəsini qazandı.

“Benfika” ilə “Eştadiu da Luş”da reallaşan matç “köhlən atlar”ın 3:2 hesablı qələbəsi ilə başa çatdı. Azərbaycan çempionu matçda möhtəşəm geridönüşlə Lissabonun “işıqlı stadion”unu zülmətə qərq etdi.

“Qarabağ” ilk yarım saatın tamamında Leandro Andrade ilə hesab arasındakı fərqi minimuma endirdikdən sonra, kim-kimdir məsələsinə böyük ölçüdə aydınlıq gətirə bilərdi. İlk hissənin son 15 dəqiqəsində Kadi topu dirəyə çırpdı, Duran isə qolkiperi ram edə bilmədi. Kamilo yalnız 48-ci dəqiqədə oyunda status-kvonu bərpa edə bildi. Qələbə qolu isə qapıçı Mateuş Koxalskinin ötürdüyü topla gəldi. “Qarabağ” “Benfika”nı Aleksey Kaşukun 86-cı dəqiqədə vurduğu qələbə qolu ilə yıxdı. Qarşılaşmanın final fitindən sonra yerli azarkeşlər “Benfika”nın meydanı tərk edən baş məşqçisi Brunu Lajeyə ağ bayraq göstərərək, onun istefa verməsini tələb etdilər.

Görünən odur ki, “qartallar” Avropanın ən güclüləri sırasında olmağı bacarsalar da, məşhur "Quttmann lənəti"ndən hələ də canlarını qurtara bilməyiblər. Kluba ardıcıl 2 Çempionlar Kubokunu qazandıran baş məşqçi Bela Quttmann diqqətdən kənar qaldığına görə klubdan ayrılır. Narazı mütəxəssisin "mənsiz 100 il heç bir Avropa kubokunu qazana bilməyəcəksiniz" cümləsi lənətə çevrilir və o vaxtdan bəri “Benfika”çıxdığı heç bir finalı qələbə ilə başa vura bilməyib. Klub, tarixi gündə də eyni aqibəti yaşadı.

Ağdam təmsilçisinin Çempionlar Liqasının Liqa mərhələsi tarixində qazandığı ilk qələbəsini seyr edənlər arasında “qartallar”ın əfsanəsi Rui Koşta da var idi. O, professor Qurban Qurbanovun Lissabonu necə məhv etdiyini görüncə başını tutdu.

“Qarabağ”ın portuqaliyalı legioneri Leandro Andrade Lissabon fatehinin futbol fəlsəfəsinin vurğunudur:

"Qurban Qurbanovun çox güclü fəlsəfəsi var. Harada oynayırıqsa, biz həmişə prinsiplərimizə sadiqik: dominant futbol, topa sahib olmaq, nəzarət, xətlər arası gözəl oyun, pressinq, topu ələ keçirmək və sürətə güvənmək. Əsas odur ki, inamlı və cəsarətli oynayaraq, futbolumuzu tətbiq edək", - deyə yarımmüdafiəçi bildirib.

“Qarabağ” məhz bu düşüncə ilə Benfikanı məyus etdi.

Bəli, Avropanın qədim şəhərlərindən olan Lissabonda baş tutan qarşılaşmanın sərfəli nəticəsinə ümidliydik. Bu əminlik hissini bizə verən də çempionumuzun Avropa arenalarında göstərdiyi oyunlar və nəticələrdir. Rəqibin kimliyindən və ya ad-sanından asılı olmayaraq, “iştah diş altındadır” deyib “köhlən atlarımıza” həmişə beləcə şahə qalxmağı arzulayırıq.

Növbəti tarixin şahidi olmaq şansını bizdən əsirgəməyin.

Namiq HUN

TodayPress TV