PUA zərbələri Rusiyanın ən böyük neft emalı müəssisəsini iflic etdi

Rusiyanın ən böyük özəl neft şirkəti olan "LUKOİL"in "Volqoqrad" neft emalı zavodu (NEZ) pilotsuz uçuş aparatlarının (PUA) hücumu nəticəsində avadanlıqların zədələnməsi səbəbindən oktyabrın 2-dən etibarən xam neft emalını tamamilə dayandırıb.

TodayPress TV xəbər verir ki, bu barədə "Reuters" agentliyi sahədəki iki mənbəyə istinadən məlumat yayıb.

Vilayət administrasiyası qubernator Andrey Boçarova istinadən oktyabrın 2-də regionun sənaye infrastrukturuna PUA-ların kütləvi hücumu barədə məlumat versə də, müəssisələrin adlarını qeyd etməyib.

Xatırladaq ki, Volqoqrad NEZ-inə ciddi zədələrə səbəb olan PUA-ların əvvəlki iri hücumları mayın 29-da və iyulun 31-də baş vermişdi.

Şirkətin saytındakı materiallara əsasən, Volqoqrad NEZ-i ildə təxminən 14 milyon ton xam neft emal etmək gücünə malikdir ki, bu, Rusiyanın NEZ-lərindəki ümumi emal həcminin təxminən 5%-ni təşkil edir.

Aysel Mətləb