BDYPİ-dən sürücülərə hava xəbərdarlığı
Daxili İşlər Nazirliyinin Baş Dövlət Yol Polisi İdarəsi (BDYPİ) sürücülərə hava şəraitinə uyğun hərəkət etmələri barədə xəbərdarlıq edib.
TodayPress TV xəbər verir ki, qurumun müraciətində hazırda Bakı və Abşeron yarımadasında müşahidə olunan yağışlı və çiskinli havanın yollarda əlavə risklər yaratdığı bildirilir.
Sürüşkən yol örtüyü, görmə imkanlarının azalması və tormoz məsafəsinin uzanması sürücülər və piyadalar üçün təhlükə yaradır.
BDYPİ sürücülərə ehtiyatlı davranmağı, sürət həddini azaltmağı, ara məsafəsini artırmağı, həmçinin avtomobilin texniki vəziyyətini – xüsusilə işıq sistemi və şüşəsilənləri – yoxlamağı tövsiyə edib.
İdarə eyni zamanda piyadaları da diqqətli olmağa çağırıb. Onlara yalnız müəyyən olunmuş keçidlərdən istifadə etmək, səki ilə hərəkət etmək və daha görünən olmaq üçün açıq rəngli və işıq əks etdirən geyimlərə üstünlük vermək tövsiyə olunub.
BDYPİ hərəkət iştirakçılarını qaydalara riayət etməyə və təhlükəsizliyə önəm verməyə çağırıb.
