Peşəkar mühasib sertifikatının əldə edilməsi qaydası dəyişdi
Nazirlər Kabineti 22 may 2019-cu il tarixli qərarı ilə təsdiq edilmiş “Peşəkar mühasib sertifikatının verilməsi prosesinin təşkili, imtahanların keçirilməsi və peşəkar mühasib sertifikatı almış şəxslərin dövlət reyestrinin aparılması Qaydaları”nda dəyişiklik edib.
TodayPress TV xəbər verir ki, bununla bağlı Baş nazir Əli Əsədov yeni qərar imzalayıb.
Qərara əsasən, bundan sonra peşəkar mühasib sertifikatlarının hər bir növü üzrə imtahanlar üçün tapşırıqlar toplusu Maliyyə Nazirliyinin nümayəndələrinə (mütəxəssislərinə) yalnız Dövlət İmtahan Mərkəzinin inzibati binasında qapalı rejimdə təqdim edilir.
Mərkəz imtahanın keçirilməsinə 5 gün qalmış peşəkar mühasib sertifikatı almaq üçün imtahanda iştirak edəcək hər bir namizədi məlumatlandırır. İndiyə qədər bu müddət 10 gün idi.
Peşəkar mühasib sertifikatı almaq məqsədilə imtahanın keçirilməsi haqqında elan Mərkəzin rəsmi internet saytında yerləşdirilir. Namizəd imtahanın keçirilməsi haqqında elan verildiyi gündən 30 gün müddətində imtahanda iştirak etmək üçün fərdi identifikasiya nömrəsini (ölkə vətəndaşları üçün şəxsiyyət vəsiqəsinin FİN kodu, əcnəbilər və vətəndaşlığı olmayan şəxslər üçün Dövlət Miqrasiya Xidmətinin verdiyi müvəqqəti və ya daimi yaşamaq üçün icazə vəsiqələrinin FİN kodu, qaçqın statusu almış əcnəbilər və vətəndaşlığı olmayan şəxslərin qaçqın vəsiqəsinin FİN kodu) göstərməklə, Mərkəzin rəsmi internet saytında yaratdığı “Şəxsi kabinet”i vasitəsilə aşağıda qeyd edilən sənədlər və ya məlumatlar əsasında Mərkəzə elektron qaydada müraciət edir:
- iqtisadi sahədə orta ixtisas təhsili haqqında sənədin (diplomun) və mühasibatlıq sahəsində azı 5 illik iş stajına malik olmasını təsdiq edən sənədin surətləri və yaxud ali təhsil haqqında sənədin (diplomun) surəti;
- Qaydaların 2.8-ci və 2.9-cu bəndlərində göstərilən sertifikatların surəti (olduğu halda) və həmin sertifikatların həqiqiliyi haqqında Maliyyə Nazirliyinin akkreditasiya etdiyi peşəkar mühasib təşkilatı tərəfindən təqdim edilmiş təsdiqedici sənəd.
Namizədin imtahanın istənilən bir mərhələsində topladığı bal sertifikat növlərindən birinin verilməsi üçün yalnız bir dəfə istifadə olunur.
Namizədin imtahanın bir mərhələsində topladığı bal 5 il qüvvədədir.
Bundan başqa, qərarla Kiçik və Orta Sahibkarlıq Subyektləri üçün Maliyyə Hesabatlarının Beynəlxalq Standartları üzrə peşəkar mühasib sertifikatı və Maliyyə Hesabatlarının Beynəlxalq Standartları üzrə peşəkar mühasib sertifikatı almaq üçün imtahanın hər bir mərhələsi üzrə ödəniş məbləği 100 manat, İctimai Sektor üçün Mühasibat Uçotunun Beynəlxalq Standartları üzrə – I səviyyə peşəkar mühasib sertifikatı və İctimai Sektor üçün Mühasibat Uçotunun Beynəlxalq Standartları üzrə – II səviyyə peşəkar mühasib sertifikatı almaq üçün imtahanın hər bir mərhələsi üzrə ödəniş məbləği 50 manat müəyyən edilib. İndiyə qədər bu ödəniş bütün növ setifikatlar üçün 50 manat idi.
