Heç nə təsadüfi baş verməyib: Politoloq Ramiz Mehdiyevlə bağlı elə faktları açdı ki...
"Ramiz Mehdiyev heç vaxt Qarabağın azad olunmasını dəstəkləməyib".
TodayPress TV xəbər verir ki, bunu politoloq Rizvan Hüseynov öz sosial media hesablarında yazıb.
O bildirib ki, Ramiz Mehdiyev Prezident Administrasiyasına rəhbərlik etdiyi dövrdə Qarabağ mövzusuna uzun-uzadı və darıxdırıcı məqalələr, kitablar vasitəsilə tez-tez toxunub. Bəzən isə Azərbaycan diplomatik korpusunun illik iclaslarında çıxış edib:
"Ümumiyyətlə, diplomatiyaya müdaxilə etmək Ramiz Mehdiyevin sevimli məşğuliyyətlərindən biri idi. İclaslara hazırlıq zamanı ona iki “xarici siyasət mütəxəssisi” məsləhət verirdi: Prezident Administrasiyasının Xarici əlaqələr şöbəsinin keçmiş müdiri Novruz Məmmədov və ideoloji şöbənin müdiri, eyni zamanda “sarı mətbuat”ın kuratoru Əli Həsənov".
Siyasətçi bildirib ki, R.Mehdiyevin həmin məqalə, kitab və çıxışlarında hər şey yer alıb:
— Qorbaçova və erməni millətçiliyinə qarşı şikayətlər;
— BMT və ATƏT-in Minsk Qrupundan ümidlər;
— Moskvanın Azərbaycan mövqeyinə ədalətli yanaşacağına inam;
— Azərbaycanın torpaqlarını heç vaxt güzəştə getməyəcəyi barədə andlar;
— Hətta Ermənistanın ilk prezidenti Levon Ter-Petrosyanın “sülhpərvər mövqeyinə” təriflər və onun Ermənistanda “başa düşülmədiyinə” görə təəssüflər.
R.Hüseynova görə, xüsusilə diqqət çəkən məqam isə R.Mehdiyevin tez-tez Qarabağ münaqişəsinin nəticəsi olaraq SSRİ-nin dağılmasına “təəssüf etdiyini” bildirməsi olub:
"Onun üçün əsas faciə milyonlarla qaçqın, işğal olunmuş torpaqlar və ya Azərbaycan xalqının şərəfi deyildi — əsas narahatlıq İttifaqın süqutu idi. Görünür, Mehdiyev gizlində sovet dövrünə nostalji hissi bəsləyirdi.
Lakin Ramiz Mehdiyev bir dəfə də olsun, heç bir çıxışında, müsahibəsində, məqaləsində və ya kitabında ermənilərin anladığı yeganə vasitə — "Dəmir yumruq"la çağırış etməyib. O, regionda hərbi-strateji balansın Azərbaycanın xeyrinə kəskin dəyişdirilməsindən də heç vaxt açıq danışmayıb. Diplomatiyanın dalana dirəndiyi vəziyyətdə qüvvə tətbiqi təhdidindən söz açmayıb. Halbuki Mehdiyevin sözünə inanardılar — xüsusilə Ermənistanda. Çünki o dövrdə Ermənistanı idarə edənlər arasında vaxtilə Azərbaycan əyalətlərində fəaliyyət göstərmiş keçmiş komsomol funksionerləri var idi və onlar üçün Ramiz Mehdiyev partiya rəhbərliyinin “ata simvolu” idi. Amma Ramiz Mehdiyev uzun illər aparat kreslosunda oturaraq, buddist rahib mantrası kimi “ermənilərlə münaqişənin yalnız sülh və diplomatik yolla həllinə” dair fikirlərini təkrarlayırdı.
Bununla belə, Prezident İlham Əliyev dünya ictimaiyyətini açıq şəkildə xəbərdar etmişdi ki, münaqişənin diplomatiya yolu ilə həlli uğursuz olarsa, müharibə qaçılmaz olacaq. O bunu açıq və birbaşa demişdi. Elə buna görə də Ramiz Mehdiyevin vəzifədən uzaqlaşdırılması ilə “Dəmir Yumruq” planının real həyata keçirilməsinin başlanması təsadüfi deyildi”.
