“Sabah”ı uğurlu sabaha aparan yol

UEFA 2025/2026-cı il mövsümünün pley-off mərhələsinin püşkləri ilə avrokubokların həlledici raunduna yaşıl işıq yandırdı.   

TodayPress TV xəbər verir ki, Avropa Futbol Assosiasiyaları İttifaqı İsveçrənin Nyon şəhərindəki mənzil-qərargahında təşkil etdiyi mərasimdə Azərbaycan təmsilçilərinin də rəqiblərini müəyyən edib.

Avropanın ən nüfuzlu klub turniri olan Çempionlar Liqasının Çempionlar yolunda inamla irəliləyən “Qarabağ” uğurlu çıxış müqabilində pley-offda "Ludogorets (Bolqarıstan) - "Ferentsvaroş" (Macarıstan) cütünün qalibi ilə bir araya gələcək. Azərbaycan çempionu Şimali Makedoniya "Şkendiya"sını büdrədə bilməsə, Balkan duetinin məğlubu ilə Avropa Liqasında qarşılaşacaq. 

Çempionumuzun bir-birindən fərqli avrokuboklar yürüşü ilə yanaşı, mövsümə damğasını vurub qitəmiqyaslı turnirlərə vəsiqə qazanan digər təmsilçilərimizin çıxışı da böyük maraq doğurur. 

Kor püşk “Araz-Naxçıvan” və “Sabah” klublarının da rəqiblərini  müəyyən edib. 

Avrokuboklardakı debüt ilində baxımlı oyunu ilə diqqət çəkən “Araz-Naxçıvan” Kipr “Omoniya”sını mübarizədən kənarlaşdırsa, Avropa Liqasında PAOK (Yunanıstan) – “Volfsberger” (Avstriya) cütünün məğlubu ilə qarşılaşacaq.

Cari mövsüm avrokubokların iki mərhləsində top qovan “Sabah” isə III təsnifat mərhələsində Bolqarıstanın “Levski” (Sofiya) kollektivi ilə münasibətlərinə aydınlıq gətirəcək. Azərbaycan Kubokunun sahibi Balkan təmsilçisini adlayıb “AZ Alkmaar” (Niderland) – “Vaduts” (Lixtenşteyn) cütünün qalibi ilə oyunda güclünü müəyyən edəcək. 

“Araz-Naxçıvanla” müqayisədə “Sabah”ın yenə püşkdə bəxti gətirməyib. Paytaxt təmsilçisi uğurlu çıxış müqabilində cütün şəksiz favoriti sayılan “Az Alkmaar”la ciddi döyüşməli olacaq. Bu missiyada təkcə döyüşmək yox, həm də heyət önəmlidir. Hər halda ümidimizi itirməyək. Beləki, paytaxt təmsilçisi buna qədər gözəl, baxımlı, izləməsi xoş olan qələbə qazanıb. Geridə qalan mərhələ analiz və geniş müzakirələrə ehtiyacın olmadığını göstərdi. Çünki rəqib “Sabah” önündə çox şeylə yadda qalmadı. Başqa sözlə "Sabah"ı çox bərkə-boşa sala bilmədi. Sofiya turu öncəsi masazırlılar gözəl 45 dəqiqəlik oyun nümayiş etdirərək kim kimdir məsələsini elə ilk yarıda bağladılar.

Unutmayaq ki, “Sabah”ın Coy-Lens Mikels kimi lokomotivi var. Adam həm "Petrokub", həm də “Selye” qarşısında fırtına idi. Mikels performansını rəqiblərin zəifliyinə bağlamaq məncə düzgün olmazdı. Təki davamlı olsun.  

“Sabah” üçün əvvəlcə "Selye", daha sonra isə "Petrokub" yaxşı sınaq oldu. Komanda bu sınaqlarda özünəinamı itirmədi. “Sabah” əsl imtahanı qismət olsa “AZ Alkmaar” qarşısında verəcək.

Bir sözlə, hər şey keçəcək, bu da... Amma heç nə izsiz keçmir!

Nə olduğunu qəbul et. Olanı burax. Nə olacağına inan.

Xatırladaq ki, UEFA Avropa Liqasına I təsnifat mərhələsindən qatılan “Sabah” klubu bu turnirdəki iştirakına görə 150 min avro mükafat qazanıb. “Selye” ilə qarşılaşmada məğlub olan komanda mübarizəsini Konfrans Liqasının II təsnifat mərhələsində davam etdirib. Bakılılar bu mərhələdə iştiraka görə 350 min, "Petrokub" üzərindəki qələbəyə görə isə əlavə 550 min avro mükafata sahib çıxıblar. 

Ümumilikdə “Sabah”ın avrokuboklardan indiyə qədər qazancı 1 milyon 50 min avro təşkil edib. Uğurlu çıxış müqabilində məbləğ daha da artacaq.

Qeyd edək ki, Konfrans Liqasında pley-off mərhələsinin ilk oyunları avqustun 21-də, cavab görüşləri isə bir həftə sonra keçiriləcək. 

Namiq HUN