Türkiyə-Rusiya-Çin ittifaqı təklifi: Reallığı əks etdirirmi?

Türkiyə Milliyətçi Hərəkat Partiyasının lideri Dövlət Baxçalı ABŞ-İsrail koalisiyasına qarşı “Türkiyə-Rusiya-Çin ittifaqı qurulsun” təklifini irəli sürüb. 

Təklif ölkədə geniş müzakirələrə səbəb olub, çünki Türkiyə tarix boyu NATO üzvü kimi Rusiya və Çinlə hərbi-siyasi ittifaq qurmayıb. 

Baxçalı bildirib ki, bu ittifaq Ankaranın ABŞ və Avropa İttifaqı ilə münasibətlərində alternativ yol ola bilər.

“İsrailin Qəzzadakı hərbi əməliyyatları da ABŞ-nin maraqlarına cavab vermir”

Bunu məsələ ilə bağlı TodayPress TV-yə açıqlamasında siyasi şərhçi Kənan Novruzov deyib:

"Hər şeydən əvvəl onu deyim ki, ABŞ-İsrail münasibətləri heç də çoxlarının təsəvvür etdiyi kimi qardaş münasibətləri deyil. Məsələn, İsrail İrana hücum etməzdən əvvəl Baş nazir Benyamin Netanyahu iki dəfə Vaşinqtona getdi və nəticəsiz qayıtdı. Əslində, ABŞ İrana qarşı müharibədə İsraili dəstəkləmir, çünki milli maraqlarına cavab vermir. İndi İsrailin Qəzzadakı hərbi əməliyyatları da ABŞ-nin maraqlarına cavab vermir. Xüsusən də Donald Trampın mövqeyinə. Niyə? Çünki Tramp “Nobel Sülh Mükafatı”na iddialıdır və deyir ki, mən bütün müharibələri dayandıracam. Belə olan halda Netanyahunun müharibə ilə bağlı addımları onun maraqlarına cavab vermir. İkincisi, rəsmi Vaşinqton dünya ilə əlaqələrdə maraqlıdır və bu əlaqələrdə İrandan istifadə edir. Başqa ölkələrdən, məsələn, ərəb ölkələrindən də faydalanır. Sadəcə olaraq, İranla müharibədə Tramp İsraili dəstəkləməyə məcbur oldu. Amma cəmi 12 gün sonra müharibənin genişlənməsinə icazə vermədi. Ola bilər ki, pərdə arxasında Tramp artıq İsrailin hərəkətlərindən bezib”, - deyə o bildirib.

“İsrailə görə Türkiyə ABŞ ilə münasibətlərini pisləşdirməz”

Ekspertin sözlərinə görə, bu proses NATO-nun dağılmasına gətirib çıxara bilər:

"Baxçalının dediyi koalisiyanın yaradılacağına gəldikdə isə, şəxsən mən inanmıram. Türkiyə NATO dövlətidir. NATO-nun əsas rəqibi olan Rusiya ilə ittifaqa girsə, NATO dövlətləri, o cümlədən ABŞ-də Türkiyəyə qarşı ciddi addımlar ata bilər. Beləliklə, NATO dağıla bilər. İkincisi, İsrailə görə Türkiyə ABŞ ilə münasibətlərini pisləşdirməz. Ona görə də bu təklif real deyil”.

“Azərbaycanın təhlükəsizliyi və xarici siyasəti ilə bağlı hansısa risk görmürəm”

O, həmçinin qeyd edib ki, sözügedən təklifin Azərbaycanın milli maraqlarına cavab vermə məsələsi hələ müzakirə mövzusu deyil: 

"Bütün hallarda Azərbaycan öz siyasətini yeridəcək və böyük şahmat taxtasında öz oyununu oynayacaq. Türkiyə ilə koordinasiyalı şəkildə hərəkət etməyə davam edəcək. Bu baxımdan, Türkiyə xarici siyasətinin necə inkişaf etməsindən asılı olmayaraq, Azərbaycanın təhlükəsizliyi və xarici siyasəti ilə bağlı hansısa risk görmürəm".

Jalə Rövşən

TodayPress TV