Aurelio De Laurentis Kvaratsxeliya transferinin səbəbini açıqladı

“Napoli” klubunun prezidenti Aurelio De Laurentis gürcü futbolçu Xviça Kvaratsxeliyanın 2025-ci ilin yanvarında “Paris Sen-Jermen”ə keçidinin səbəblərini açıqlayıb.

TodayPress TV xəbər verir ki, bu barədə RMC Sport məlumat yayıb. 

De Laurentis bu addımı atmağa məcbur qaldığını deyib:

“Mən Kvaratsxeliyanı satmalı oldum, çünki onun agenti müqaviləni birtərəfli qaydada pozmaqla təhdid edirdi. İlk möhtəşəm mövsümündən sonra biz dərhal müqavilənin uzadılması üzərində işləməyə başladıq və maaşını ciddi şəkildə artırmağı təklif etdik. Çünki aşağı maaş futbolçuya Avropanın yarısının maraq göstərəcəyini açıq şəkildə göstərirdi. Amma bu kifayət etmədi. Onun agenti Mamuka Cuxeli həm öz planlarını, həm də oyunçunun maraqlarını güdürdü. O, başqa klubdan böyük komissiya və Xviça üçün ikiqat maaş istəyirdi”, – deyə De Laurentis bildirib.

Qeyd edək ki, Kvaratsxeliyanın PSJ klubu ilə müqaviləsi 2029-cu ilə qədər nəzərdə tutulub.

Namiq HUN