Türkiyədə hava şəraiti kəskin dəyişir. Sinoptiklərin son proqnozlarına görə, yaxın günlərdə temperatur 6–10 dərəcə enəcək, güclü yağışlar və külək ölkə üzrə təsirli olacaq.

TodayPress TV xəbər verir ki, Meteorologiya Baş İdarəsinin məlumatına əsasən, hava şəraiti mövsüm normlarından xeyli aşağı düşəcək və bu vəziyyət çərşənbə gününə qədər davam edə bilər.

Xüsusilə ölkənin qərb bölgələrində soyuma daha hiss olunacaq.

Həftəsonundan etibarən bir çox bölgədə yağışlar başlayacaq. Mərmərə, Egey, Aralıq dənizi, Mərkəzi Anadolu, Qara dəniz, Şərqi Anadolu və Cənub-Şərqi Anadolu bölgələrində dəyişkən və yağıntılı hava gözlənilir. Yağışların əsasən leysan və göy gurultulu şəkildə olacağı bildirilir.

Bəzi yüksək dağlıq ərazilərdə isə sulu qar və qar yağışı ehtimalı var. Qərbi və Mərkəzi Qara dənizin iç bölgələri, Mərkəzi Anadolunun şimalı və Şimali Egey yüksəkliklərində qarla qarışıq yağıntılar gözlənilir.

Sinoptiklər xüsusilə Mərkəzi Anadolu, Şərqi Aralıq dənizi və Şərqi Qara dənizin bəzi rayonlarında yağıntının daha güclü olacağını bildirərək əhali üçün ehtiyatlı olma çağırışı edir.

TodayPress TV